თბილისის სახელმწიფო უნივერსიტეტში რექტორის მოვალეობის შემსრულებლის არჩევნები დასრულდა. არჩევნებში მონაწილეობა მიიღო უნივერსიტეტის აკადემიურო საბჭოს 30-მა წევრა, საიდანაც 28-მ ჯაბა სამუშიას დაუჭირა მხარი. ის მაქსიმუმ ექვსი თვის ვადით შეასრულებს რექტორის მოვალეობას.

ჯაბა სამუშია ერთადერთი კანდიდატი იყო, რომელმაც თსუ-ს რექტორის მოვალეობის შემსრულებლის თანამდებობაზე შეიტანა განაცხადი.
თსუ-ს რექტორის თანამდებობა მას შემდეგ გახდა ვაკანტური, რაც რექტორმა გიორგი შარვაშიძემ 7 ოქტომბერს საკუთარი განცხადებით აკადემიურ საბჭოს მიმართა და გადადგომა მოითხოვა. თბილისის სახელმწიფო უნივერსიტეტის რექტორის მოვალეობის შემსრულებლის კანდიდატთა რეგისტრაცია 13 ოქტომბერს დასრულდა. თსუ-ს ადმინისტრაციის განცხადებით, რექტორის მოვალეობის შემსრულებლის არჩევნებში მონაწილეობისთვის საბუთები მხოლოდ ერთმა პირმა შეიტანა.

კენჭისყრის პროცესი სტუდენტების ნაწილის საპროტესტო აქციის ფონზე მიმდინარეობდა. ახალგაზრდების შეფასებით, არჩევნები წესის დარღვევით მიმდინარეობდა და რექტორის მოვალეობის შემსრულებლის არჩევა აკადემიური საბჭოს ნაცვლად, აკადემიური პერსონალის მიერ უნდა მომხდარიყო.

"როგორც ვიცით, არჩევნებში მონაწილეობა უნდა მიიღოს მინიმუმ 2-მა კანდიდატმა, თუმცა არსებობს მხოლოდ ერთი. არ ვიცი, რა თანხას უხდიან ხალხს, ვინც შიგნით არის და რის საფუძველზე აკეთებენ ასეთ არასამართლიან რაღაცას, მაგრამ ფაქტი ერთია - ეს არის არალეგიტიმური, არასამართლიანი და ჩვენ ვითხოვთ, რომ ჩატარდეს სამართლიანი არჩევნები და ამომრჩეველი იყოს არა 38 კაცი, არამედ მეტი, სრული პროფესურა", - აცხადებდნენ სტუდენტები.