მეორე ფრონტი არ იქნება, ივანიშვილს დაცვა არ სჭირდება, - ამის შესახებ მმართველი პარტიის თავმჯდომარე ირაკლი კობახიძემ უკრაინის მიერ ბიძინა ივანიშვილის ოჯახის დასანქცირებასთან დაკავშირებით ტვ პირველთან კომენტირებისას განაცხადა.

მისი თქმით, უკრაინის უშიშროების საბჭომ ივანიშვილის ოჯახის წევრები იმიტომ დაასანქცირა, რომ "ხელისუფლებამ საქართველოში მეორე ფრონტი არ გახსნა".

"უკრაინის უშიშროების საბჭოს მდივანი არის დანილოვი, რომელიც მოგვიწოდებს მეორე ფრონტისკენ. ნახეთ, დანილოვი თან მოგვიწოდებს მეორე ფრონიტისკენ, თან ცდილობს დაშანტაჟებას. ვისთვის ითხოვს დაშანტაჟებას? - მეორე ფრონტისთვის, ლოგიკა თქვენთვის მომინდია. ვერც დანილოვი და ვერც სხვები საქართველოში მეორე ფრონტის გახსნას ვერ მიაღწევენ"- განაცხადა კობახიძემ.

ჟურნალისტის შეკითხვაზე რატომ ვერ მოახერხა ხელისუფლებამ, რომ ივანიშვილის ოჯახი სიაში არ აღმოჩენილიყო, კობახიძემ თქვა, "იმიტომ რომ მეორე ფრონტი არ გავხსენით".

"მეორე ფრონტი არ იქნება, ივანიშვილს დაცვა არ სჭირდება"- განაცხადა მან.

შეგახსენებთ, უკრაინამ ბიძინა ივანიშვილის ოჯახის წევრები - ძმა, ალექსანდრე ივანიშვილი,რძალი ქეთაევან ხარაიძე და დეიდაშვილი, დეიდაშვილი უჩა მამაცაშვილი და მისი შვილი, ტატე მამაცაშვილი დაასანქცირა.

პრეზიდენტ ზელენსკის ბრძანება პრეზიდენტის ოფიციალურ საიტზე ცოტა ხნის წინ გამოქვეყნდა.