ბელარუსიდან უკრაინაზე რუსეთის თავდასხმის რისკი დაბალია. ამის შესახებ ამერიკის ომის შემსაწავლელი ინსტიტუტის (ISW) მიმოხილვაშია ნათქვამი.

მანამდე, უკრაინის შეიარაღებული ძალების გენშტაბის მთავარი ოპერატიული სამმართველოს უფროსის მოადგილემ ოლექსეი გრომოვმა განაცხადა, რომ ბელარუსის ტერიტორიიდან განმეორებითი შეტევის საფრთხე იზრდება.

ISW-ის ანალიტიკოსების აზრით, უახლოეს თვეებში მოვლენების მსგავსი განვითარების რისკი ნაკლებსავარაუდოა, ვინაიდან, რუსეთის ძალებს არ გააჩნიათ უნარი დასავლეთიდან გადაკეტონ უკრაინის მომარაგების გზა სახმელეთო იერიშის დახმარებით.

აღმოსავლეთიდან უახლოესი უკრაინის სარკინიგზო ხაზი ბელარუსის საზღვრიდან 30 კმ-ში მდებარეობს, პრიპიატის ჭაობები კი უკიდურესად ართულებს მობილური ომის წარმოებას საერთაშორისო საზღვრის გასწვრივ ვოლინისა და როვნოს რეგიონებში.

ექსპერტები აღნიშნავენ, რომ უკრაინის საავტომობილო და სარკინიგზო ხაზებს აქვთ საკმარისი კვანძები პოლონეთთან, რუმინეთთან, სლოვაკეთთან და უნგრეთთან, რათა რუსეთის შეჭრამ ბელარუსიდან სერიოზულად ვერ გაართულოს უკრაინის ლოჯისტიკური ხაზი უკრაინის სიღრმეში შეჭრის გარეშე, როგორც ეს რუსებმა კიევისთვის ბრძოლის დროს გააკეთეს, როდესაც რუსული არმია ძლიერი იყო. დღეს ეს ძალები მნიშვნელოვნად არის დასუსტებული.

აშშ-ის ეროვნული უსაფრთხოების საკითხებში სპიკერმა ჯონ კირბიმ 20 ოქტომბერს განაცხადა, რომ ბელარუსმა საზღვარზე, შესაძლოა, ცოცხალი ძალა განალაგოს, რათა უკრაინის ჩრდილოეთით უკრაინელი სამხედროების განთავსება მოხდეს და ამით ხელი შეეშალოს სამხრეთ და აღმოსავლეთ უკრაინაში აქტიური საბრძოლო მოქმედებების ზონაში მათ გადასროლას.