ამერიკის შეერთებული შტატების სახელმწიფო მდივანმა ენტონი ბლინკენმა განაცხადა, რომ აშშ ვერ ხედავს ნიშნებს, რომ რუსეთის ფედერაცია დაინტერესებულია ომის დასრულებით.

ამის შესახებ მან საფრანგეთის საგარეო საქმეთა მინისტრ კეტრინ კოლონასთან ერთობლივ პრესკონფერენციზე თქვა.

„როდესაც საუბარია დიპლომატიაზე, რათა ომი შეწყდეს, ეს მთლიანად დამოკიდებულია იმაზე, მივა თუ არა რუსეთი იმ წერტილამდე, სადაც ის ნამდვილად დაინტერესებული იქნება აგრესისიის შეწყვეტით, რომელიც მან წამოიწყო. ამ მომენტისთვის ჩვენ ამის ნიშნებს ვერ ვხედავთ“, - განაცხადა ბლინკენმა.

მისი თქმით, პირიქით, რუსეთი აორმაგებს თავის აგრესიას, რაც გამოიხატება ასობით ათასი მოქალქის მობილიზაციაში, ფიქტიურ რეფერენდუმებსა და უკანონო ანექსიებში, სამოქალქო ინფრასტრუქტურის დაბომბვაში.  

 „ამრიგად, ყველაფერი იმაზე მიანიშნებს, რომ პრეზიდენტი პუტინი შორს არის განზრახვისგან დაკავდეს შინაარსობრივი დიპლომატიით, აგრძელებს მოქმედებას საწინააღმდეგო მიმართულებით. ფუნდამენტური პრობლემა, რომელიც მას აქვს, იმაში მდგომარეობს, რომ უკრაინელი ხალხი არამხოლოდ უკიდურესად მამაცი და მედგარია, არამედ  წარმატებულია აგრესიის მოგერიებასა და თავისი მიწების დაბრუნებისათვის ბრძოლაში“, - განაცხადა ბლინკენმა.

 „უკრაინელები იბრძვიან თავიანთი ქვეყნისთვის, თავიანთი მიწისთვის, თავიანთი მომავლისთვის, რუსეთი - არა. რაც უფრო სწრაფად მიხვდება ამას პუტინი, მით უფრო მალე დამთავრდება ეს ომი“, - აღნიშნა ბლინკენმა.

მისი თქმით, აშშ გამოიყენებს ყველა საშუალებას დიპლომატიის წინსვლისთვის, თუ კი ამ შესაძლებლობას დაინახავს.

„რა თქმა უნდა, ჩვენ ყოველთვის განვიხილავთ ამას, მაგრამ როგორც უკვე ვთქვი, ამ მომენტისთვის რუსეთი არ ავლენს არანაირ ნიშანს დაკავდეს აზრიანი დიპლომატიით“, - განაცხადა ბლინკენმა.