ოკუპანტები ისე ცუდად არიან მომზადებული და აღჭურვილი, რომ რუსეთში მალე მობილიზაციის ახალი ტალღა დაიწყება, - ამის შესახებ უკრაინის პრეზიდენტმა ვოლოდიმირ ზელენსკიმ ვიდეომიმართვისას განაცხადა.

 „დღეს მტერი ავრცელებს ინფორმაციას მათი თითქოს და მობილიზაციის დასრულების შესახებ... თითქოს ფრონტზე მოქალაქეების ახალი ტალღის გაგზავნის საჭიროება არ არის.

ჩვენ წინა ხაზზე სულ სხვა რამეს ვგრძნობთ. იმის მიუხედავად, რომ რუსეთი ცდილობს ჩვენს პოზიციებზე ზეწოლის გაძლიერებას, იყენებს რა მობილიზებულებს, მაგრამ ისინი იმდენად ცუდად არიან მომზადებული და აღჭურვული, იმდენად უხეშად იყენებს მათ ხელმძღვანელობა, რომ ეს გვაძლევს საშუალებას ვივარაუდოთ, რომ მალე რუსეთს დასჭირდება ომში ადამიანების ახალი ტალღის გაგზავნა.

ჩვენ ამისთვის ვემზადებით - ვემზადებით იმისთვის, რომ რუსეთის დღევანდელი ხელმძღვანელობა ნებისმიერი ახალი შესაძლებლობების ძებნას დაიწყებს, რათა გააგრძელოს ომი. მათ შორის ირანში თავისი თანამზრახველების დახმარებით.  

სწორედ ამიტომ ყოველდღიურად ვმუშაობთ პარტნიორებთან იმისათვის, რომ გავაძლიეროთ ჩვენი საჰაერო თავდაცვა, სხვა თავდაცვითი შესაძლებლობები. ყოველდღიურად ვაძლიერებთ ჩვენი კრიტიკული ინფრასტრუქტურის დაცვას, უპირველესად ენერგეტიკული ინფრასტრუქტურის“, - განაცხადა ზელენსკიმ.