ბრიტანეთის დაზვერვის ცნობით, რუსეთის მიერ ხერსონიდან, რუსი მხედართმთავრის გრიგორი პოტიომკინის ნეშტის გატანა სავარაუდოდ მიუთითებს იმაზე, რომ რუსეთი ხერსონიდან უკან დახევისთვის ემზადება.

ამასთან, 27 ოქტომბერს  რუსეთის მიერ ხერსონის ოლქის ოკუპირებული ნაწილის გუბერნატორად დანიშნულმა ვლადიმირ სალდომ განაცხადა, რომ ხერსონიდან 70 ათასზე მეტი ადამიანი გაიყვანეს.

მანამდე, 26 ოქტომბერს მანვე განაცხადა, რომ  ხერსონის კათედრალიდან გაიტანეს მე-18 საუკუნის ცნობილი რუსი სამხედრო მეთაურის გრიგორი პოტიომკინის ნეშტი.

„რუსულ ეროვნულ იდენტობაში პოტიომკინი მჭიდროდაა დაკავშირებული მე-18 საუკუნეში რუსეთის მიერ უკრაინული მიწების დაპყრობასთან  და ხაზს უსვამს იმ მნიშვნელობას, რომელსაც პუტინი ომის მის მიერ წარმოდგენილ ისტორიულ გამართლებას ანიჭებს,“ – აღნიშნულია დაზვერვის ანგარიშში.

უწყების შეფასებით, პოტიომკინის ძვლების სიმბოლური გატანა და მოქალაქეების მასობრივი გასვლა, სავარაუდოდ, მიუთითებს რუსეთის განზრახვაზე, რეგიონიდან უკან დახევა დააჩქაროს.