რუსეთმა უკრაინის 10 რეგიონში 18 ობიექტს დაარტყა. მათი უმეტესობა ენერგოობიექტია. ამის შესახებ უკრაინის პრემიერ-მინისტრმა დენის შმიგალმა განაცხადა.

რუსების იერიშის შედეგად შვიდ ოლქში ასობით დასახლებული პუნქტი ელექტროენერგიის გარეშეა დარჩენილი.

 „შედეგები, შესაძლოა, უფრო მძიმე ყოფილიყო. მაგრამ საჰაერო თავდაცვის გმირული და ეფექტური მეშაობის წყალობით, ჩვენს ტერიტორიაზე 50-ზე მეტი გამოშვებული რაკეტიდან, ჩამოგდებულია 44. მადლობა ჯარისკაცებს, რომლებიც იცავენ ჩვენს ცას“, - აღნიშნა პრემიერ-მინისტრმა.

შმიგალმა მადლობა გადაუხადა ენერეგტიკის სფეროს წარმომადგენლებს, რომლებიც რუსეთის თავდასხმის შედეგების აღმოსაფხვრელად მუშაობენ.

ამჟამად, ლოკალური ავარიული გამორთვები გრძელდება კიევის, ზაპოროჟიეს, დნიპროპეტროვსკისა და ხარკოვის რეგიონებში. როგორც პრემიერმა აღნიშნა, მნიშვნელოვანია, რომ უკრაინელებმა შეამცირონ დატვირთვა ქსელზე და დაზოგონ ელექტროენერგია.

31 ოქტომბერს, დილით რუსეთის ძალებმა უკრაინის წინააღმდეგ სარაკეტო იერიში განახორციელა.

კიევში ათამდე აფეთქების ხმა გაისმა. მათი ნაწილი დედაქალაქის შემოგარენიდან ისმოდა.

რუსეთმა სარაკეტო დარტყმა კიევის კრიტიკულ ინფრასტრუქტურაზე მიიტანა. შედეგად, უკრაინის დედაქალაქის რამდენიმე რაიონს წყალი და დენი შეზღუდულად მიეწოდება.

აფეთქებები იყო ასევე ვინიცის, პოლტავის, კიროვოგრადისა და ოდესის ოლქებშიც.

უკრაინული მედიის ცნობით, ვინიცის ოლქში ერთ-ერთი ჩამოგდებული რაკეტა სამოქალაქო ობიექტებს დაეცა. დაშავებულებისა და დაღუპულების შესახებ ინფორმაცია ჯერ არ ვრცელდება.

31 ოქტომბრის დილიდან მთელი უკრაინის მასშტაბით საჰაერო თავდასხმის გამაფრთხილებელი სიგნალი იყო ჩართული.