ამერიკის შეერთებული შტატების თავდაცვის მდივან ლოიდ ოსტინის განცხადებით, უკრაინის არმიას ხერსონში, მდინარე დნიპროს დასავლეთ ნაპირზე ტერიტორიების დაბრუნება შეუძლია.

„ყველაზე მნიშვნელოვანია, რომ უკრაინელებს სჯერათ, რომ ამის გაკეთება შეუძლიათ“, - განაცხადა ოსტინმა 3 ნოემბერს პენტაგონში, სამხრეთ კორეის თავდაცვის მინისტრთან შეხვედრის შემდეგ გამართულ პრესკონფერენციაზე.

ლოიდ ოსტინის თქმით, უკრაინელები მეთოდურად და ეფექტიანად მიმართავენ ძალისხმევას საკუთარი ტერიტორიების დასაბრუნებლად და გააგრძელებენ ზეწოლას, სანამ ამას არ მიაღწევენ დნიპროს დასავლეთ ნაპირზეც.

უკრაინის შეიარაღებულმა ძალებმა რუსეთის მიერ ოკუპირებულ ხერსონის ოლქში კონტრშეტევა ზაფხულში დაიწყეს და ათეულობით დასახლებული პუნქტი გაათავისუფლეს.