ე.წ. მთავარი ოპოზიცია, „ნაციონალური მოძრაობა“ და მათი პოლიტიკური გემი იძირება, დავით კეზერაშვილი ცდილობს, ამ გემისგან გადარჩენილი ნაწილებით ნავი ან ტივი მაინც შეაკოწიწოს, – ამის შესახებ საპარლამენტო უმრავლესობის წევრმა არჩილ თალაკვაძემ განაცხადა.

მისი თქმით, „ნაციონალურ მოძრაობაში“ ღრმა კრიზისიდან გამომდინარე, დანარჩენმა ოპოზიციურმა ჯგუფებმა, თუ ლიდერებმა დაინახეს, რომ უკვე ჩნდება თავისუფალი სივრცე ოპოზიციაში და ყველანაირად ცდილობენ, ეს სივრცე აითვისონ.

„მათ სცადეს ერთად, ცალ-ცალკეც, დამარცხდნენ არაერთხელ ორივე ფორმით. ამიტომ დღეს ოპოზიციამ შეიძლება, გამოიტანოს ერთადერთი დასკვნა, რომ შესაკრებების ცვლილებით გამარჯვების მიღწევა შეუძლებელია, გამარჯვებას სჭირდება ჯანსაღი იდეური კონკურენცია, მომავალზე ორიენტირებული ლიდერები, რომლებიც მათ არ ჰყავთ და სჭირდება ხალხთან ურთიერთობა. ჩვენ კარგად ვნახეთ, რამხელა განსხვავება იყო ჩვენს და მათ საარჩევნო კამპანიას შორის, როდესაც მიზერულად ცოტა შეხვედრები ჰქონდათ მათ საზოგადოებასთან“, – განაცხადა არჩილ თალაკვაძემ.