ამერიკელი მსახიობი და კინორეჟისორი შონ პენი რუსეთის უკრაინაში შეჭრის შემდეგ კიევში მესამედ ჩავიდა, ამჯერად მან ვოლოდიმირ ზელენსკის თავისი ოსკარი გადასცა.

"როცა გაიმარჯვებთ, დამიბრუნეთ" - უთხრა შონ პენმა უკრაინის პრეზიდენტს.

ვოლოდიმირ ზელენსკიმ თქვა, რომ მათი შეხვედრა განსაკუთრებული იყო.

"ამჯერად ჩვენი შეხვედრა განსაკუთრებული იყო. შონმა ჩამოიტანა თავისი ოსკარი, როგორც ჩვენი ქვეყნის გამაჯვების რწმენის სიმბოლო. ის უკრაინაში დარჩება ომის დასრულებამდე", - თქვა ზელენსკიმ.

ვოლოდიმირ ზელენსკიმ უკრაინის სახელით, ამერიკელი მსახიობი ღირსების III ხარისხის ორდენით დააჯილდოვა.

ასევე ამერიკელი მსახიობი და უკრაინის პრეზიდენტი იმყოფებოდნენ სიმამაცის ხეივანში, სადაც შონ პენის სახელია ამოტვიფრული.