ვაპირებ მონაწილეობას „ნაციონალური მოძრაობის“ თავმჯდომარეობის არჩევნებში, ამის შესახებ მუმლაძე სოციალურ ქსელში წერს.

როგორც მუმლაძე აღნიშნავს, მისი მიზანია, პარტიის „უუნარო თავმჯდომარე ნიკა მელია და პარტიის უმოქმედო მენეჯმენტი“ სრულად ჩამოსცილდეს პარტიის მართვას.

„გადაწყვეტილება მიღებულია!

ვაპირებ მონაწილეობის მიღებას „ერთიანი ნაციონალური მოძრაობის“ თავმჯდომარეობის არჩევნებში!

ჩემი მიზანია, არსებული უუნარო თავმჯდომარე ნიკა მელია და პარტიის უმოქმედო მენეჯმენტი, სრულად ჩამოსცილდეს პარტიის მართვას!

ცვლილებების შემდეგ, პარტიის უზარმაზარი ადამიანური და მატერიალური რესურსი, უნდა მიემართოს რუსი ოლიგარქის „იძულების კამპანიისკენ“, რითაც დავიხსნით მიხეილ სააკაშვილს პოლიტიკური ტყვეობიდან და გადავარჩენთ საქართველოს ევროატლანტიკურ მომავალს!

მოვითხოვ, ჩემი წარმომადგენლები, ჩართულნი იყვნენ თავმჯდომარის არჩევნების ფორმატის შემუშავებაში, რომ პროცესი იყოს სანდო, გამჭვირვალე და უზრუნველყოფდეს სამართლიან კონკურენციას!

პარტიაში ჩატარდება ძირეული და არა კოსმეტიკური ხასიათის ცვლილებები. დამკვიდრდება შიდა პარტიული დემოკრატიის მაღალი სტანდარტი. გადაწყვეტილებების მიღების პროცესი იქნება მონაწილეობითი და არა კულუარული!“, – წერს მუმლაძე.

მისივე თქმით, ნიკა მელიას დებატებში იწვევს.

„ვიწვევ ნიკა მელიას ნებისმიერი ფორმატის საჯარო დებატებში და მზად ვარ, არგუმეტირებულად ავუხსნა „ნაციონალური მოძრაობის“ მხარდამჭერებს, თუ რატომ აღარ უნდა იყოს ის თავმჯდომარე და რამდენად დიდი შესაძლებლობების მომტანია რეალური ცვლილებები ამ პარტიისთვის!

მივმართავ „ერთიან ნაციონალური მოძრაობას“, დროულად მოიწვიოს პოლიტსაბჭო და უზრუნველყოს სანდო საარჩევნო პროცესი!“, – წერს მუმლაძე.

მანამდე, პარტიის თავმჯდომარეობაზე საკუთარი კანდიდატურის წარდგენის შესახებ განცხადება გიორგი ჩალაძემაც გააკეთა.