რუსეთის უშიშროების საბჭოს ხელმძღვანელის მოადგილე დმიტრი მედვედევი აცხადებს, რომ რუსები პანიკაში არ უნდა იყვნენ ხერსონიდან რუსული ჯარის უკან დახევის გამო. ის რუსეთის მოქალაქეებს არწმუნებს, რომ ყველა ანექსირებული ტერიტორია საბოლოო ჯამში რუსეთს დაუბრუნდენა. ამის შესახებ მედვედევი Telegram-ზე წერს.

„ტერიტორიული სუვერენიტეტის გაგება ჩვენს ქვეყანაში არსად გამქრალა. ყველაფერი სახლში დაბრუნდება, რუსეთის ფედერაციაში. ალარმიზმი (შფოთვა)  ყველა არაგულგრილი ადამიანისა, სრულიად გასაგებია, ისტერია და პანიკა კი - არა“, - ამბობს ის.

მედვედევმა რუსებს მოუწოდა არ მისცენ ახლო და შორეულ მტერს გახარების საბაბი და ხშირად შეახსენონ ყველას „რუსული სამყაროს სიდიადე და უსასრულობა.“

11 ნოემბერს რუსეთის თავდაცვის სამინისტრომ განაცხადა, რომ დასრულდა ხერსონიდან მდინარე დნიპროს მარცხენა ნაპირზე ჯარის გადაყვანა.

ამასთან, რუსეთის პრეზიდენტის პრესსპიკერმა დმიტრი პესკოვმა განაცხადა, რომ ხერსონის ოლქი, სამხედროების გადაწყვეტილების მიუხედავად, „რუსეთის ნაწილად რჩება, ამ მხრივ არ არის და არც იქნება არანაირი ცვლილება“.

ამავდროულად,  უკრაინული მედია წერს, რომ უკრაინელ დამცველებს სიხარულით ეგებებიან ხერსონის ოლქის გათავისუფლებულ სოფლებში და მათ გამოჩენას ქალაქ ხერსონში ელოდებიან.