უკრაინის პრეზიდენტი ვოლოდიმირ ზელენსკი ხერსონში ჩავიდა, ინფორმაციას სააგენტო Reuters-ი ავრცელებს.

"ჩვენ წინ მივდივართ, ჩვენ მზად ვართ მშვიდობისთვის , მშვიდობისთვის მთელ ჩვენს ქვეყანაში",- განაცხადა ზელენსკიმ ქალაქის ცენტრალურ მოედანზე გამოსვლისას. ზელენსკი სამხედროების წინაშე გამოვიდა, მადლობა გადაუხადა ნატოს და სხვა მოკავშირეებს უკრაინის მხარდაჭერისთვის

ზელენსკიმ თქვა, რომ შეერთებული შტატებისგან მიღებულ რეაქტიულ საარტილერიო სისტემა HIMARS-ს კიევისთვის დიდი მნიშვნელობა ჰქონდა.

ვოლოდიმირ ზელენსკის ქალაქის მცხოვრებლები უკრაინის დროშებით შეეგებნენ. ზელენსკიმ განაცხადა, რომ ის ბედნიერია ხალხის რეაქციის გამო, რადგან მათი რეაქცია დადგმული არაა.

უკრაინის შეიარაღებული ძალების სამხედროები და პოლიცია ხერსონსა და მის შემოგარენში 11 ნოემბერს შევიდნენ.

ჯერ ოფიციალურად არ დასრულებულა ე.წ სტაბილიზაციის ღონისძიებები. უკრაინის ხელისუფლების განცხადებით, ჰუმანიტარული მდგომარეობა ქალაქში და მის მიმდებარედ კვლავ მძიმეა. დაწყებულია ინფრასტრუქტურის აღდგენისა და ტერიტორიების განაღმვის სამუშაოები.