ბიძინა  ივანიშვილი არის მსოფლიოში საუკეთესო არაფორმალური, ერთპიროვნული ლიდერი და მისთვის კონკურენციის გაწევა ამ სფეროში არის წარმოუდგენელი, - ამის შესახებ  "გირჩის" დეპუტატმა, იაგო ხვიჩიამ პარლამენტის პლენარულ სხდომაზე განაცხადა.

"მინდა, რომ ნაციონალურ მოძრაობას არ ჰყავდეს ერთპიროვნული მმართველი, რადგან, თუ ებრძვი, რაღაც თვალსაზრისით, ერთპიროვნულ მმართველობას და არ მოგწონს ქართულ ოცნებაში, ზუსტად იგივე პრობლემა აქვს ამას ნაციონალურ მოძრაობაშიც. მიხეილ სააკაშვილი აქამდე იყო არაფორმალური ერთპიროვნული მმართველი, იმის გამო რომ მას მოქალაქეობა არ ჰქონდა, საქართველოში არ იყო და ა.შ. ამ პროცესმა ძალიან შეუშალა ხელი ენმ-ს, როგორც ქართული ოცნების ერთპიროვნული მმართველობა ქვეყანას უშლის ხელს.

თუ ეს არ გამოსწორდა, ბრძოლა ქართულ ოცნებასთან არაფორმალური მმართველობით არის თავიდანვე წაგებული, იქიდან გამომდინარე, რომ ქართული ოცნების ლიდერი, ბატონი ბიძინა ივანიშვილი არის მსოფლიოში საუკეთესო არაფორმალური, ერთპიროვნული ლიდერი და მასზე კონკურენციის გაწევა ამ სფეროში არის წარმოუდგენელი", - განაცხადა იაგო ხვიჩიამ.