ევროკომისრის, ოლივერ ვარჰეის მოწოდება, რომ ოპოზიცია ჩართული იყოს 12-პუნქტიანი გეგმის შესრულების პროცესში, ცალსახად ერთმნიშვნელოვანი და მისაღებია, – ამის შესახებ „ნაციონალური მოძრაობის“ წევრმა, ლევან ბეჟაშვილმა განაცხადა.

მისი თქმით, საჭიროა, „ქართული ოცნება“, როგორც სამთავრობო ძალა, მაქსიმალური პასუხისმგებლობით მოეკიდოს ამ მოწოდებას.

„ფასადური ცვლილებებით, ფასადური პროექტების მიღებით, ბუნებრივია, 12-პუნქტიანი გეგმის შესრულების სულისკვეთება დაცული არ იქნება და ჩვენი დასავლელი პარტნიორების შემდგომი გადაწყვეტილებაც ადეკვატური იქნება. ქვეყანამ კანდიდატის სტატუსი რომ მიიღოს, მნიშვნელოვანია ოპოზიციის ჩართულობით, კონსენსუსით მოხდეს მთელ რიგ საკითხებზე გადაწყვეტილების მიღება. მაგალითი არის დეოლიგარქიზაციის შესახებ კანონპროექტი, სადაც ხელისუფლება კვლავ საპარლამენტო ძალმომრეობით ცდილობს, თავს მოახვიოს ისეთი პროექტი, რომელიც ქვეყნის რეალობას არ შეესაბამება და მხოლოდ ფასადურად ემსახურება 12-პუნქტიანი გეგმის მნიშვნელოვანი პუნქტის შესრულებას. დეპოლარიზაციის საკითხისთვის, ყველაზე მნიშვნელოვანია ქართული პოლიტიკის მთავარი განმსაზღვრელი ფაქტორის, მიხეილ სააკაშვილის სამკურნალოდ საზღვარგარეთ გადაყვანა. ნიკა გვარამიას, როგორც მთავარი მედიამენეჯერის, ოპოზიციური მედიამენეჯერის გათავისუფლება. ამ გადაწყვეტილებების მიღება, რომელსაც სჭირდება მხოლოდ პოლიტიკური ნება, ეს დაუდებდა საფუძვლად ქვეყანაში დეპოლარიზაციას. შესაბამისად, უზრუნველყოფდა ქვეყნის მომავალ ევროპულ პერსპექტივას. ამიტომ „ქართულმა ოცნებამ“ უნდა გადადოს პარტიული, პოლიტიკური შურისძიების მოტივები, იხელმძღვანელოს ქვეყნის ინტერესებით და უზრუნველყოს ამ ორი ადამიანის გათავისუფლება“, – განაცხადა ლევან ბეჟაშვილმა.