Associated Press-ი სამ ამერიკელ მაღალჩინოსანზე დაყრდნობით იუწყება, რომ რაკეტა, რომელიც პოლონეთის ტერიტორიაზე ჩავარდა და ორი ადამიანი იმსხვერპლა, შესაძლოა, უკრაინის საჰაერო თავდაცვას ეკუთვნოდა.

გამოცემის წყაროების თქმით, წინასწარი შეფასებებით, აღნიშნული რაკეტა უკრაინის საჰაერო თავდაცვის სისტემამ რუსული რაკეტის ჩამოსაგდებად ისროლა.

აღნიშნული ინფორმაცია ეწინააღმდეგება ერთ-ერთი ამერიკელი წყაროს მიერ გავრცელებულ ინფორმაციას, რომ, 15 ნოემბერს, რუსულმა რაკეტებმა პოლონეთის საზღვარი გადაკვეთეს.

როგორც ცნობილია, 15 ნოემბერს, რუსეთმა მასირებული სარაკეტო დარტყმები განახორციელა უკრაინის ტერიტორიაზე. ამავე დღეს, უკრაინის მოსაზღვრე პოლონეთის ერთ-ერთ დასახლებაში ჩავარდა რაკეტა, რის შედეგადაც ორი ადამიანი დაიღუპა. პოლონეთში დაუყოვნებლივ მოიწვიეს მინისტრთა საბჭოს ეროვნული უსაფრთხოებისა და თავდაცვის კომიტეტი და მიიღეს გადაწყვეტილება ზოგიერთი ქვედანაყოფის საბრძოლო მზადყოფნის გაზრდის შესახებ, ასევე განიხილეს ნატო-ს შეთანხმების მეოთხე მუხლის ამოქმედების შესაძლებლობა.

პოლონეთის პრეზიდენტმა ანჯეი დუდამ საგანგებო მიმართვაში განაცხადა, რომ ვარშავას არ აქვს ზუსტი ინფორმაცია, რომელი მხრიდან მოხდა რაკეტის გასროლა, თუმცა დაადასტურა, რომ ის რუსული წარმოებისაა. პოლონეთმა აფეთქების გამოძიებისთვის ქვეყანაში საერთაშორისო ექსპერტები მიიწვია.

რუსეთის თავდაცვის სამინისტრო ამტკიცებს, რომ პოლონეთის ტერიტორიაზე რაკეტის ჩამოვარდნასთან არანაირი კავშირი არ აქვს.