ამერიკის ომის შემსწავლელი ინსტიტუტის (ISW) ექსპერტები აცხადებენ, რომ რუსეთმა მნიშვნელოვნად ამოწურა მაღალი სიზუსტის შეიარაღების სისტემის მარაგები და სავარაუდოდ, იძულებული იქნება შეამციროს დარტყმები უკრაინის კრიტიკული ინფრასტრუქტურის წინააღმდეგ.

გუშინ, 15 ნოემბერს, რუსეთმა მასირებული სარაკეტო იერიში მიიტანა უკრაინის კრიტიკულად მნიშვნელოვან ინფრასტრუქტურაზე. უკრაინის  საჰაერო ძალების სარდლობის ოფიციალური წარმომადგენლის იური იგნატის ინფორმაციით, რუსმა სამხედროებმა უკრაინის ტერიტორაიზე 100-მდე ფრთოსანი რაკეტა Х-101 და Х-555 ისროლეს.

რუსეთის ძალებმა დარტყები მიიტანეს კიევის, ასევე როვენის, ჟიტომირის, ლვოვის, ხმელნიცკის, დნიპროპეტროვსკის, პოლტავის, ვინიცის, ოდესის, კიროვოგრადის, ჩერკასის, ვოლინისა და ხარკოვის ოლქების წინააღმდეგ.

ISW-ში ამბობენ, რომ რუსებმა, 15 ნოემბერს, კოორდინირებული სარაკეტო დარტყების დროს, სავარაუდოდ, გამოიყენეს მაღალი სიზუსტის შეიარაღების მნიშვნელოვნად დიდი ნაწილი.

უკრაინის გენშტაბის ინფორმაციით, უკრაინის საჰაერო თავდაცვის სისტემებმა 73 რუსული ფრთოსანი რაკეტა და ყველა უპილოტო საფრენი აპარატი ჩამოაგდეს. 10 ოქტომბერს რუსეთის მასირებული დარტყმების დროს უკრაინის ძალებმა 84-დან გაანეიტრალეს 43 ფრთოსანი რაკეტა და 13 დრონი.

ჩამოგდებული რაკეტების მზარდი რაოდენობა აჩვენებს ბოლო ერთ თვეში უკრაინის საჰაერო თავდაცვის უკეთეს მუშაობას, რასაც უკრაინის გენშტაბი დასავლეთის საჰაერო თავდაცვის სისტემების ეფექტურობით ხსნის.

ISW-ში ფიქრობენ, რომ რუსეთის ძალებმა მნიშვნელოვანდ ამოწურეს მაღალი სიზუსტის შეიარაღების მარაგი, რის გამოც სავარაუდოდ, რუსეთს უკრაინის ენერგეტიკულ ობიექტებზე სარაკეტო დარტყმების ტემპის შემცირება მოუწევს. ამასთან, ექსპერტები აღნიშნავენ, რომ რუსეთის სარაკეტო დარტყმები კვლავ საფრთხეს წარმოადგენს მშვიდობიანი მოსახლეობისთვის, თუმცა აღნიშნავენ, რომ უკრაინის ენერგეტიკის ინფრასტრუქტურისთვის მიყენებული ზიანი უკრაინელების სულისკვეთებას ვერ გატეხს.