მიუღებელი არის ჩემთვის პირადად, მე ვირჩევდი, რომ უფრო მეტად ზომიერი განცხადებები გაკეთდეს იგივე ამერიკის ელჩის მისამართით., – ამის შესახებ საქართველოს პრემიერ-მინისტრმა პარლამენტში მმართველ პარტიას გამოყოფილ "ხალხის ძალაზე" საუბრისას განაცხადა, საკანონმდებლო ორგანოში პრემიერს დღეს ინტერპელაციის წესით უსმენენ.

"რამდენიმე დეპუტატმა დატოვა ჩვენი პარტია, ეს მათი არჩევანია, ჩვენ მანამდეც გვქონდა საუბარი პარტიის შიგნით, თუ რა შინაარსის, ამაზე ღიად არ დავიწყებ საუბარს, ეს არ არის ჩვენი სტილი, მაგრამ ჩვენი გზები, რომ იტყვიან, გაიმიჯნა. თავად ამ ადამიანებმა, ძვირფასმა დეპუტატებმა, გადაწყვიტეს, რომ შექმნან ცალკე დამოუკიდებელი მორაობა და პარტიაც, ალბათ, ეს მათი არჩევანია. ჩვენ ამაზე ვთქვით არაერთხელ, ძალიან მკაფიოდ, რომ ჩვენი პოზიციები არის გამიჯნული და გაყოფილი, ჩვენ გვაქვს მთელი რიგი განსხვავებები, მაგრამ ისინი რჩებიან უმრავლესობაში, რომ არ დარჩნენ უმრავლეოსბაში, ქართული ოცნება დაკარგავს უმრავლესობას, ჩვენ გვექნება რეალურად პრობლემები, რომ მივიღოთ კანონები.

რა თქმა უნდა, მიუღებელი არის ჩემთვის პირადად, მე ვირჩევდი, რომ უფრო მეტად ზომიერი განცხადებები გაკეთდეს იგივე ამერიკის ელჩის მისამართით. მე ასე მიმაჩნია, ყოველ შემთხვევაში, ეს ჩემი აზრია. თუ კითხვები არსებობს, კი ბატონო, კითხვები დავსვათ, მაგრამ, რა თქმა უნდა,  არ შეიძლება, ზომიერება დავარღვიოთ. ჩვენ ვართ პატარა სახელმწიფო, მაგრამ ძლიერი ხალხით. ჩვენ ვართ უძველესი ერი, 3 000 წელზე მეტი ისტორიით, ჩვენი კულტურით, ცივილიზაციით, ერით, სარწმუნოებით და ჩვენ გვჭირდება  ძალიან პრაგმატული, გონივრული და ზომიერი მოქმედებაც და პოლიტიკის წარმოება. შეიძლება, განსხვავებები გვქონდეს ჩემს ყოფილ თანაგუნდებელთან, შეიძლება, სხვაც არ მეთანხმებოდეს, სხვას უფრო მეტად სხვა აზრები ჰქონდეს - ეს ყველა ადამიანის დემოკრატიული კონსტიტუციური უფლებაა. ამიტომ, ნურავის ნუ განვიკითხავთ, ნუ განვკიცხავთ, ყველა ადამიანს აქვს თავისი აზრი. ვისაუბროთ, დებატები გავმართოთ, ერთმანეთს საწინააღმდეგო აზრები გავუზიაროთ, მაგრამ არ შეიძლება ასეთი შეურაცხყოფების მიყენება, ეს არის ერთმანეთის მიმართ დაუშვებელი, მთავარი ამოცანა უნდა იყოს სიმშვიდის გამყარება"- თქვა ღარიბაშვილმა.

მას შემდეგ, რაც "ქართული ოცნება" დატოვეს,  დეპუტატებმა არაერთი წერილი გაავრცელეს, რომლებშიც წერენ, რომ აშშ-ს ელჩს, კელი დეგნანს ქვეყნის ომში ჩართვა სურს.