ირანში, საპროტესტო აქციის მონაწილეებმა ისლამური რესპუბლიკის დამაარსებლის, აიათოლა ხომეინის სახლ-მუზეუმს ცეცხლი წაუკიდეს. ინფორმაციას BBC ავრცელებს.

სოციალურ ქსელებში ვრცელდება ვიდეოკადრებიც, თუმცა ადგილობრივი ხელისუფლება ამ ფაქტს უარყოფს.

გავრცელებული ინფორმაციით, სწორედ ამ სახლში დაიბადა აიათოლა ხომეინი, მოგვიანებით კი, შენობა მუზეუმად გადაკეთდა.

ხომეინი ირანის 1979 წლის ისლამური რევოლუციის ლიდერი იყო, რომელმაც მოგვიანებით თეოკრატიული სახელმწიფო ჩამოაყალიბა და თავად ქვეყნის სულიერი ლიდერი გახდა. ხომეინი 1989 წელს გარდაიცვალა.

ამჟამინდელი სულიერი ლიდერის, აიათოლა ალი ხამენეის წინააღმდეგ ანტისამთავრობო პროტესტი ბოლო ორი თვეა გრძელდება, რომელიც ახალგაზრდა ქურთი ქალის მაჰსა ამინის გარდაცვალების გამო დაიწყო.

13 სექტემბერს მაჰსა ამინი ოჯახთან ერთად გადაადგილებისას მორალის პოლიციამ გააჩერა, რომელსაც ქალების ჩაცმულობის მკაცრი კონტროლი ევალება. მაჰსა ჰიჯაბის "არასწორი" ტარებისთვის დააკავეს.

თვითმხილველების თქმით, დაკავებისას მაჰსა პოლიციის ფურგონში სცემეს. 22 წლის ქალი დაკავების შემდეგ მალევე გარდაიცვალა.

პროტესტი 17 სექტემბერს ქურთების ქალაქ საკეზში ქალის დაკრძალვაზე დაიწყო.

უფლებადამცველები ამბობენ, რომ დარბევების შედეგად 200-ზე მეტი ადამიანი დაიღუპა, მათ შორის არასრუწლოვნებიც.