ეკლესიის სიძულვილი და მტრობა არის შენი ქვეყნის სიძულვილი და მტრობა. ლიბერალიზმის საფარქვეშ ვერ შეფუთავენ ფსევდოლიბერალურ აგრესიას, - ამის შესახებ ფრაქცია ქართული ოცნების თავმჯდომარემ, მამუკა მდინარაძემ საპატრიარქოს პრესმდივნის დეკანოზ ანდრია ჯაღმაიძის Facebook-პოსტზე საუბრისას განაცადა.

მდინარაძე ამბობს, რომ ანდრია ჯაღმაიძის Facebook-პოსტი იყო მის გვერდზე დაფიქსირებული პირადი აზრი და მას "ფსევდოლიბერალები თავს დაესხნენ".

"ეკლესიას აყენებენ შეურაცხყოფას და პირდაპირ ებრძვიან. ეკლესიის წარმომადგენელმა გუშინწინ Facebook-პოსტი დადო, თავის ნააზრევი თავის პირად გვერდზე გამოაქვეყნა და ლიბერალებს რომ უწოდებენ საკუთარ თავს და სინამდვილეში ფსევდოლიბერალების აგრესიასთან რომ გვაქვს საქმე, ეს გამოჩნდა ამ პოსტის კომენტარებში... ეს არ არის ლიბერალიზმი, არც ტოლერანტობა, ეს არის მტრობა ეკლესიის, შენი იდენტობის, შენი სამშობლოსი და შენი ქვეყნის, როცა თავს ესხმი თავისუფალ სიტყვას, აზრს, ეკლესიას.

საპატრიარქოს ოფიციალურ წარმომადგენელზეა აქ საუბარი, რომელმაც პრაქტიკულად თქვა, რომ აგრესია, ზიზღი, სიძულვილი შობს ახალ აგრესიას და ზიზღს. დაგმო ქალზე ძალადობა. თუ ვინმე გააკრიტიკა იმას არ ნიშნავს რომ თავს უნდა დაესხა და რუსეთის აგენტი ეძახო. ეკლესიის სიძულვილი და მტრობა არის შენი ქვეყნის სიძულვილი და მტრობა. ლიბერალიზმის საფარქვეშ ვერ შეფუთავენ ფსევდო ლიბერალურ აგრესიას", - თქვა მდინარაძემ დღეს პარტიის ოფისში გამართულ ბრიფინგზე.

26 ნოემბერს პოლიციამ დააკავა ორი პირი, რომლებმაც ხაშურის მუნიციპალიტეტში ცხრამუხის მონსასტერში 70 წლის მონაზონი გააუპატიურეს და მასზე ფიზიკურად იძალადეს.

საპატრიარქოს საზოგადოებასთან ურთიერთობის სამსახურის ხელმძღვანელის, დეკანოზ ანდრია ჯაღმაიძის აზრით, ცხრამუხის მონასტერში მონაზონზე ძალადობა და მისი გაუპატიურება ზოგიერთი მედიისა და კრიტიკოსების მიერ ორგანიზებული ანტიეკლესიური კამპანიის შედეგია, რომელიც "მოსახლეობის ნაწილზე მძიმე გავლენას ახდენს".

დღეს, 28 ნოემბერს, სასამართლომ ორივე ბრალდებულს აღკვეთის ღონისძიების სახით პატიმრობა შეუფარდა.