უკრაინის პრეზიდენტმა ვოლოდიმირ ზელენსკიმ ვიდეომიმართვისას განაცხადა, რომ უკრაინა არასდროს მიიღებს მოსკოვის მიერ ნაკარნახევ წესრიგს.

მისი თქმით, მხოლოდ გასულ კვირას რუსეთის არმიამ 258-ჯერ გაუხსნა ცეცხლი ხერსონს და მის შემოგარენს და 30 დასახლებულ პუნქტს დარტყმები მიაყენა. კერძოდ, დააზიანა სატუმბი სადგური, რომელიც მიკოლაევს წყლით ამარაგებს.

მანამდე რუსულმა არმიამ დატოვა დნიპროს მარცხენა სანაპირო და ხერსონიდან უკან დაიხია, თუმცა ახლა მოპირდაპირე ნაპირიდან იერიშებს განაგრძობს.

 „რა უნდა ვთქვათ მათზე? აი ეს არის ნამდვილი არსი იმ შემთხვევითი „ამხანაგების“, რომლებმაც დაიპყრეს რუსეთი. მათ 20-წლიანი მმართველობის შემდეგ მათი სახელმწიფოს დიდ ნაწილზე ისეთი განადგურება აქვთ, თითქოს იქ ომა ჩაიარა. არადა ეს ომი არ ყოფილა, ეს მათ ჩაიარეს. მათ ნგრევის მეტი არაფერი შეუძლიათ. ეს არის ყველაფერი, რასაც ისინი ტოვებენ. ის, რასაც ისინი ახლა უკრაინის წინააღმდეგ აკეთებენ, არის შურისძიების მცდელობა იმისთვის, რომ უკრაინელებმა არაერთხელ დაიცვეს მათგან თავიანთი თავი. უკრაინა არასდროს გახდება ნგრევის ადგილი, უკრაინა არასდროს მიიღებს მოსკოვიდან ამ „ამხანაგების“ ნაკარნახევ წესრიგს. ყველაფერს გავაკეთებთ, რათა აღვადგინოთ დამპყრობლების მიერ დანგრეული ყოველი ობიექტი, ყოველი სახლი, ყოველი საწარმო“, – განაცხადა ზელენსკიმ.