ლატვიის ელექტრონული მასმედიის ეროვნულმა საბჭომ (NEPLP) რუსული ტელეკომპანია „დოჟდი“ დააჯარიმა, კომპანიის წინააღმდეგ გამოძიება დაიწყო.

მანამდე ერთ-ერთი გადაცემის წამყვანმა პირდაპირ ეთერში მაყურებელს მოუწოდა, რომ მობილიზაციის დროს მომხდარი დარღვევების თაობაზე აცნობოს ტელეკომპანიას, რომელსაც შეუძლია აღჭურვილობით დაეხმაროს ფრონტზე მყოფ რუს ჯარისკაცებს.

საბჭოს თავმჯდომარე ივარს აბოლინშმა განაცხადა, რომ ტელეკომპანიამ ოკუპირებული ყირიმი რუსეთის შემადგენლობაში დაასახელა და რუსეთის არმიას „ჩვენი არმია“ უწოდა.

„დოჟდის“ მიმართ ადმინისტრაციული სამართალდარღვევის საქმე აღიძრა.

„დოჟდის“ მთავარი რედაქტორის, ტიხონ დიადკოს განცხადებით, პირველი დეკემბერს გადაცემა „აქ და ახლა“ გამოშვებაში ტელეარხის წამყვანმა თქვა ფრაზა: „გამოგვიგზავნეთ შეტყობინებები army@tvrain.tv-ზე ან მოგვწერეთ ჩვენს ტელეგრამაში. ვიმედოვნებთ, რომ ჩვენ შევძლებთ დავეხმაროთ ბევრ სამხედრო მოსამსახურეს, მათ შორის, მაგალითად, აღჭურვილობით და უბრალოდ ფრონტზე ელემენტარული კეთილმოწყობით.“

დიადკოს თქმით, ეს ფრაზა მაყურებელს უქმნის განცდას, რომ ტელეარხი „დოჟდი“ დახმარებას უწევს რუსეთის ჯარს. „დოჟდის“ ხელმძღვანელობის მტკიცებით, საფოსტო ყუთი army@tvrain.tv შეიქმნა იმისთვის, რომ შეაგროვოს პირადი მტკიცებულებები უკრაინაში რუსული არმიის დანაშაულებებზე და რუსეთში მობილიზაციის დროს დარღვევებზე. ტელეკომპანიამ ჩანაწერი წაშალა და მაყურებელს ბოდიში მოუხადა, ტელეწამყვანთან კი თანამშრომლობა შეწყვიტა.

რუსულმა ტელეკომპანია „დოჟდმა“ მაუწყებლობა მარტში დროებით შეწყვიტა და მოგვიანებით რიგაში, ამსტერდამში, თბილისსა და პარიზში სტუდიების გახსნის შესახებ განაცხადა.