ირანის ხელისუფლება მიმდინარე საპროტესტო აქციების ფონზე, აცხადებს, რომ განიხილავს ჰიჯაბის ტარების სავალდებულო კანონს.

The Guardian-ის ცნობით, ირანის ხელისუფლებამ განაცხადა, რომ გადახედავენ ათწლეულების წინანდელ კანონს, რომელიც ქალებს ჰიჯაბის ტარებას ავალდებულებს.

ირანის გენერალური პროკურორი, მოჰამედ ჯაფარ მონთაზერი აცხადებს, რომ ქვეყანა მორალის პოლიციას გააუქმებს. 

„პარლამენტიც და სასამართლო სისტემაც მუშაობენ [საკითხზე] იმის შესახებ, სჭირდება თუ არა კანონს რაიმე ცვლილება... მიმომხილველი ჯგუფი ოთხშაბათს შეხვდა პარლამენტის კულტურის კომისიას და შედეგებს იხილავთ ერთ-ორ კვირაში“, - თქვა მოჰამედ ჯაფარ მონთაზერმა.

ირანში საპროტესტო აქციები სექტემბრიდან მიმდინარეობს. მოსახლეობის პროტესტი 22 წლის მაჰსა ამინის გარდაცვალების შემდეგ დაიწყო, რომელიც „მორალის პოლიციამ“ 13 სექტემბერს ჰიჯაბის არასწორი გამოყენების გამო დააკავა. დაკავების შემდეგ გოგონა კომაში ჩავარდა. იმავე დღეს ის საავადმყოფოში გადაიყვანეს, სადაც ორი დღის შემდეგ შინაგანი დაზიანებების შედეგად გარდაიცვალა.

პროტესტი 17 სექტემბერს ქურთების ქალაქ საკეზში ქალის დაკრძალვაზე დაიწყო.

უფლებადამცველები ამბობენ, რომ საპროტესტო აქციების დარბევების შედეგად 200-ზე მეტი ადამიანი დაიღუპა, მათ შორის არასრუწლოვნებიც.