ევროკომისიამ რუსეთის წინააღმდეგ ევროკავშირის სანქციების მე-9 პაკეტი ოფიციალურად წარადგინა. სანქციების დეტალებზე ევროკომისიის ხელმძღვანელმა ურსულა ფონ დერ ლაიენმა განაცხადა.

აღნიშნულ პაკეტში სასანქციო სიას 200-მდე რუსეთის მოქალაქე და კომპანია დაემატება.

ფონ დერ ლაიენის განცხადებით, ეს ის კომპანიები იქნებიან, რომლებიც დაკავშირებული არიან რუსეთის შეიარაღებულ ძალებთან, სამხედროებთან, სახელმწიფო დუმისა და ხელისუფლების წევრებთან.

ევროკომისიის პრეზიდენტის განცხადებით, შავ სიაში მოხვდება კიდევ სამი რუსული ბანკი, ექსპორტზე შეზღუდვები დაუწესდება რუსულ პროდუქციას, განსაკუთრებით კი, ორმაგი დანიშნულების პროდუქტებსა და ელექტრონიკას, ასევე შეიზღუდება ოთხი რუსული ტელეარხის მაუწყებლობა.

„ჩვენ მხარს ვუჭერთ უკრაინას და ვაიძულებთ რუსეთს თავისი სისასტიკისთვის პასუხი აგოს. არსებული სასანქციო რვა პაკეტი მას უკვე მნიშვნელოვან ზიანს აყენებს“, – აღნიშნა ურსულა ფონ დერ ლაიენმა.