ამერიკელი კალათბურთელი ბრიტნი გრაინერი, რომელიც რუსეთში ნარკოტიკების კონტრაბანდის ბრალდებით იყო დაპატიმრებული, რუს იარაღით მოვაჭრე ვიქტორ ბუტში გაცვალეს. ინფორმაციას BBC ავრცელებს.

გავრელებული ცნობით, ბუტი უკვე რუსეთში დაბრუნდა, რუსეთის საგარეო საქმეთა სამინისტროს ინფორმაციით, გაცვლა აბუ-დაბის აეროპორტში შედგა.

გრაინერი თებერვალში შერემეტიევოს აეროპორტში დააკავეს. სპორტსმენის ბარგში ელექტრონული სიგარეტის ჰაშიშის ზეთის კარტრიჯები აღმოაჩინეს. ნივთიერება აკრძალულია რუსეთში, თუმცა ლეგალურია აშშ-ის ზოგიერთ შტატში. კალათბურთელის წინააღმდეგ სისხლის სამართლის საქმე ნარკოტიკების კონტრაბანდის მუხლით აღიძრა, რომელიც 10 წლამდე თავისუფლების აღკვეთას ითვალისწინებს. გრაინერმა სასამართლოში განმარტა, რომ გამოფრენამდე ბარგი სიჩქარეში ჩაალაგა და კარტრიჯების რუსეთში ჩამოტანა განზრახ არ უცდია.

სასამართლომ გრაინერს 9 წლით თავისუფლების აღკვეთა მიუსაჯა.

ვიქტორ ბუტი ცნობილი რუსი იარაღით მოვაჭრეა. 2008 წელს ის ტერორისტულ ორგანიზაციებთან კავშირის ბრალდებით ამერიკელმა სამართალდამცავებმა დაიჭირეს, 2012 წელს ბუტს 25-წლიანი პატიმრობა მიესაჯა. მისი ზედმეტსახელია "სიკვდილით მოვაჭრე". 2005 წელს ბუტის ბიოგრაფიის მიხედვით ფილმი "იარაღით მოვაჭრე" გამოვიდა, რომელშიც ბუტის პროტოტიპის როლი ნიკოლას ქეიჯმა შეასრულა.