ყველა გეგმის ჩავარდნის შემდეგ, კვლავ დაიგეგმა მიხეილ სააკაშვილის მეშვეობით ქვეყნის არევა, - ასე აფასებს ფრაქცია „ქართული ოცნების“ თავმჯდომარე მამუკა მდინარაძე ხვალ მიხეილ სააკაშვილის სასამნართლო პროცესის პარალელურად დაანონსებუილ აქციას.

„რაც შეეხება ხვალინდელ აქციას, პირველი გეგმა იყო მიხეილ სააკაშვილის საქართველოში ჩამოსვლა და ქვეყნის არევა, ბევრი გეგმის კრახით გავლის ფონზე, კვლავ დაუბრუნდნენ პირველ გეგმას, რომელიც იყო მიხეილ სააკაშვილის მეშვეობით ქვეყნის არევა. ახლა პირველ გეგმას უბრუნდებიან, რადგან ყველა დანარჩენი გეგმა ჩავარდა და თავიანთი დავალების მიმცემებიც უკმაყოფილოები არიან, ვერაფერი მოახერხეს, ქვეყანა ვერ არიეს, ომში ვერ ჩართეს, ეკონომიკას ვერ დაარტყეს, მშვიდობას ვერ დაარტყეს. რეალურად, ფუჭი აღმოჩნდა ყველა ეს მცდელობა და ახლა უბრუნდებიან მიხეილ სააკაშვილს, მისი ავადმყოფობის გაპიარებით, რომლისთვისაც ლობისტებიც დაიქირავეს, ქვეყნის არევის ახალ მცდელობას“, – აღნიშნა მამუკა მდინარაძემ.

მამუკა მდინარაძის თქმით, აქციებსა და რადიკალიზმზე განცხადებები მუქარად შეიძლება აღიქვას ადამიანმა, მაგრამ ეს არარელევანტურია, რადგან ქართული სახელმწიფო შედგა.

„რამდენჯერაც დაიმუქრეს – ხან ცხელი შემოდგომით დაგვემუქრნენ, ხან გადატრიალებით, ხან დამხობით, სამწუხაროდ, შემდეგ ამაში ჟურნალისტები ჩართეს, იყო პერიოდი, „ენჯეო“ სექტორს საერთოდ სახე დააკარგვინეს, წარმოიდგინეთ, წაშალეს საქართველოში „ენჯეო“ სექტორი, რადგან მათ აიძულეს ეს ხალხი, მისცეს დავალება, სცენაზე დამდგარიყვნენ და მოეთხოვათ ხელისუფლების დამხობა, გადადგომა და ასე შემდეგ. ამ მცდელობებმაც კი არ გაჭრა. რა იქნება, როგორი იქნება, სასამართლოს გადასაწყვეტია, მხოლოდ სასამართლო, ობიექტურად გადაწყვეტს, რა ეკუთვნის ან არ ეკუთვნის რომელიმე პატიმარს, მათ შორის, თუნდაც ის იყოს ყოფილი პრეზიდენტი. რა ეკუთვნის და რა არ ეკუთვნის, არა სასჯელის, არამედ იმ ნაწილში, რომლისთვისაც ლობისტები ჰყავთ დაქირავებული“, – განაცხადა მამუკა მდინარაძემ.