სამართალდამცველებმა გერმანიის ქალაქ დრეზდენში სავაჭრო ცენტრიდან მოქალაქეების ევაკუაცია მოახდინეს, ამის მიზეზი გახდა შეიარაღებული პირის მიერ მძევლების აყვანის შესახებ გავრცელებული ინფორმაცია.

აღნიშნულის შესახებ ცნობებს DW ავრცელებს.

შეიარაღებული პირი სავაჭრო ცენტრ Altmarktgalerie-ში მდებარე აფთიაქში იმყოფება, ადგილზე მობილიზებულია პოლიციელთა დიდი რაოდენობა.

პოლიციამ, ახლოს მდებარე საშობაო ბაზრობა დაკეტა და მოქალაქეებს მიმდებარე ტერიტორიაზე გადაადგილებისგან თავშეკავებისკენ მოუწოდა.

პოლიციის წარმოადგენელთა განცხადებით, ვითარება ამ დრომდე გაურკვეველია. რამდენიმე ადგილობრივი მედიასაშუალების ინფორმაციით, შეიარაღებულმა კაცმა ჯერ Radio Dresden-ის შენობაში შეჭრა სცადა, ის პისტოლეტიდან ისროდა, თუმცა არავინ დაჭრილა.

გერმანული გამოცემა Bild-ი იუწყება, რომ სროლის შედეგად დაიღუპა 70 წლის ქალი, რომელიც დაახლოებით 40 წლის თავდამსხმელმა მოკლა. პოლიცია მსხვერპლის შესახებ ინფორმაციას არ ადასტურებს.

სამართალდამცველთა ცნობით, დრეზდენში სატრანსპორტო მოძრაობა სრულად გაჩერებულია.