უკრაინაში რუსეთის პრიორიტეტული ამოცანა, სავარაუდოდ, კვლავ დონეცკის ოლქის სიღრმეში შესვლაა, მაგრამ რუსეთი უახლოეს თვეებში ამ მიზნის მიღწევას ვერ შეძლებს. ამის შესახებ ბრიტანეთის დაზვერვის ანგარიშშია ნათქვამი.

 „რუსეთის სტრატეგია უახლოეს პერიოდში, სავარაუდოდ, ვერ მიაღწევს თავის მიზნებს: ნაკლებსავარაუდოა, რომ რუსმა სამხედროებმა შეძლონ ეფექტური დამრტყმელი ძალის შექმნა, რომელსაც ამ ტერიტორიების დაკავების შესაძლებლობა ექნება“, - ნათქვამია ინფორმაციაში.  

ბრიტანეთის დაზვერვა ფიქრობს, რომ რუსეთის სახმელეთო ჯარები სავარაუდოდ, ვერ მიაღწევენ რაიმე  პროგრესს რამდენიმე თვის განმავლობაში.

8 დეკემბერს, რუსეთის პრეზიდენტის პრესმდივანმა დმიტრი პესკოვმა მორიგ ჯერზე განაცხადა, რომ უკრაინაში რუსეთის „სპეციალური სამხედრო ოპერაციის“ მიზანია დონბასისა და სამხრეთ-აღმოსავლეთ უკრაინის მოსახლეობის „დაცვა“.

ბრიტანეთის დაზვრევა მიიჩნევს, რომ პესკოვის სიტყვები დადასტურებაა იმისა, რომ ომში რუსეთის მინიმალური პოლიტიკური მიზნები უცვლელია.

 „რუსეთი, სავარაუდოდ, ჯერ კიდევ ცდილობს დაამყაროს კონტროლი დონეცკის, ლუჰანსკის, ზაპოროჟიესა და ხერსონის ოლქების მთელ ტერიტორიებზე“, - ნათქვამია ანგარიშში.