უკრაინის საგარეო საქმეთა მინისტრმა დმიტრო კულებამ ევროკავშირის ქვეყნებს მოუწოდა მხარი დაუჭირონ სპეციალური ტრიბუნალის შექმნის იდეას, რომლის მიხედვით რუსეთის პოლიტიკური და სამხედრო ხელმძღვანელობა გასამართლდება.

„ერთადერთი, რამაც  ევროპის გულში პუტინის ბარბაროსული აგრესია გამოიწვია - ეს არის მისი სრული დაუსჯელების განცდა. ის ამ განცდას მრავალი წლის განმავლობაში გრძნობდა და დარწმუნებული იყო, რომ ყველაფერი შეეძლო. მისი ერთხელ და სამუდამოდ  გაჩერების ერთადერთი საშუალებაა - შეიქმნას უკრაინის წინააღმდეგ განხორციელებული აგრესიის გამო სპეციალური ტრიბუნალი. მას {ტრიბუნალს} შეუძლია პასუხი აგებინოს რუსეთის პოლიტიკურ და სამხედრო ხელმძღვანელობას“, - განაცხადა კულებამ ევროკავშირის საგარეო საქმეთა მინისტრების შეხვედრაზე ვიდეოჩართვისას.

რუსეთის აგრესიასთან დაკავშირებით სპეციალური ტრიბუნალის შექმნის იდეა პირველად ბრიტანეთმა გამოთქვა. ამ იდეას მთავრობების დონეზე უკრაინის გარდა მხარი დაუჭირეს საფრანგეთმა, ნიდერლანდებმა, ბალტიის ქვეყნებმა, ასევე ევროპარლამენტმა.