ევროკავშირის ქვეყნების საგარეო საქმეთა მინისტრებმა დაგმეს რუსეთისთვის შეიარაღების მიწოდებასთან დაკავშირებით ირანის ქმედებები და თეირანს სანქციებით დაემუქრნენ.

„ევროკავშირი მტკიცედ აფრთხილებს ირანს რუსეთისთვის ნებისმიერი ახალი შეიარაღების მიწოდებასთან, კერძოდ, რუსეთისთვის მცირე რადიუსის მქონე ბალისტიკური რაკეტების გადაცემისკენ მიმართულ ნებისმიერ ნაბიჯებთან დაკავშირებით, რომელიც გამოიწვევს კონფლიქტის სერიოზულ ესკალაციას. ევროკავშირი გააგრძელებს რეაგირებას უკრაინის მიმართ რუსეთის აგრესიის ნებისმიერ მხადაჭერაზე და აიძულებს ირანს პასუხი აგოს, მათ შორის დამატებითი შემზღუდავი ზომების მეშვეობით“, - ნათქვამია რეზოლუციაში.    

ევროკავშირის ქვეყნების საგარეო საქმეთა მინისტრები რეზოლუციაში აღნიშნავენ, რომ რუსეთი განურჩევალდ იყენებს ირანულ დრონებს უკრაინის მშვიდობიანი მოსახლეობისა და ინფრასტრუქტურის წინააღმდეგ. მათივე განცხადებით, რუსეთისთვის შეიარაღების მიწოდება წარმოადგენს გაეროს უსაფრთხოების საბჭოს 2231-ე რეზოლუციის დარღვევას.

ირანთან 2015 წელს მიღწეული ბირთვული შეთანხმებისა და მისი მხარდამჭერი, 2231-ე რეზოლუცია, ირანისთვის ადრინდელი სანქციების აღდგენის შესაძლებლობას იძლევა იმ შემთხვევაში, თუ ირანი სერიოზულად დაარღვევს შეთანხმების პირობებს.