დიდი შვიდეულის ლიდერებმა ერთობლივი განცხადება გამოაქვეყნეს. ისინი უკრაინას დახმარებას აღუთქვამენ. მათი თქმით,  ვლადიმერ პუტინი და ომზე პასუხისმგებელი პირები საერთაშორისო სამართლის თანახმად, პასუხისგებაში მიეცემიან. 

“ვადასტურებთ ჩვენს ურყევ მხარდაჭერას და სოლიდარობას უკრაინის მიმართ რუსული აგრესიული ომის ფონზე. ჩვენ ვგმობთ რუსეთის მუდმივ არაჰუმანურ და სასტიკ თავდასხმებს კრიტიკულ ინფრასტრუქტურაზე, განსაკუთრებით ენერგეტიკულ, წყალმომარაგების ობიექტებსა და უკრაინის ქალაქებზე. 

თავდასხმები  მშვიდობიან მოსახლეობაზე ან სამოქალაქო ობიექტებზე, წარმოადგენს ომის დანაშაულს.

ასევე ვგმობთ მათ, ვინც ხელს უწყობს პუტინის უკანონო ომს. მზად ვართ დავეხმაროთ უკრაინას მისი კრიტიკული ენერგეტიკული და წყლის ინფრასტრუქტურის შეკეთებაში, აღდგენასა და დაცვაში.

დავეხმარებით უკრაინას ზამთრისთვის მომზადებში, კიდევ უფრო გავაძლიერებთ ჩვენს ძალისხმევას ამ მხრივ საერთაშორისო კონფერენციის დროს, რომელიც გაიმართება პარიზში 13 დეკემბერს.

გადაწყვეტილი გვაქვს, რომ რუსეთმა საბოლოოდ  გადაიხადოს სასტიკი ომის შედეგად დაზიანებული ან განადგურებული კრიტიკული ინფრასტრუქტურის ფასი. არ შეიძლება იყოს დაუსჯელი ომის დანაშაულებისა და სხვა სისასტიკისთვის.

საერთაშორისო სამართლის მიხედვით, პრეზიდენტ პუტინს და სხვა ომში მონაწილე პირებს პასუხისგებაში მივცემთ.

ვიმეორებთ, რომ რუსეთის უპასუხისმგებლო ბირთვული რიტორიკა მიუღებელია და რომ ქიმიური, ბიოლოგიური ან ბირთვული იარაღის ნებისმიერ გამოყენებას მძიმე შედეგებს მოჰყვება”, - წერია განცხადებაში.