ევროპარლამენტმა ჰოლოდომორი, რომელიც საბჭოთა რეჟიმმა უკრაინაში 1932-33 წლებში მოაწყო, გენოციდად აღიარა.

„ევროპარლამენტის დეპუტატები მკაცრად გმობენ ქმედებებს, რომელმაც მილიონობით უკრაინელის სიკვდილი გამოიწვია და მოუწოდებს ყველა ქვეყანასა  და ორგანიზაციას, რომლებსაც ეს ჯერ კიდევ არ გაუკეთებიათ, მიბაძონ მათ მაგალითს და აღიარონ ის გენოციდად“, - ნათქვამია განცხადებაში.

რეზოლუციაში აღნიშნულია, რომ ტოტალიტარული საბჭოთა რეჟიმის განდიდებამ და საბჭოთა დიქტატორის იოსებ სტალინის კულტის აღორძინებამ მიგვიყვანა იქამდე, რომ დღეს რუსეთი ტერორიზმის სპონსორ სახელმწიფოს წარმოადგენს.

ევროპარლამენტის დეპუტატები ასევე გმობენ რუსეთის დანაშაულებს, რომელსაც კვლავ ადგილი აქვს უკრაინელი ხალხის წინააღმდეგ, რაც არის ზამთრის პერიოდში უკრაინის ენერგეტიკული ინფრასტრუქტურის მიზანმიმართული განადგურება.

რეზოლუცია რუსეთის ამჟამინდელ რეჟიმს ადანაშაულებს უკრაინის სუვერენიტეტისა და ტერიტორიული მთლიანობის დარღვევაში, უკრაინის, როგორც სუვერენული სახელმწიფოსა და მისი ხალხის იდენტობისა და კულტურის განადგურების მცდელობაში.

რეზოლუცია ასევე გმობს იმ ფაქტს, რომ მიმდინარე ომმა შექმნა გლობალური სასურსათო კრიზისი, რა დროსაც  რუსეთი ანადგურებს და ძარცვავს უკრაინის ხორბლის საცავებს და ხელს უშლის უკრაინის მარცვლეულის ექსპორტს მსოფლიოს ღარიბ ქვეყნებში.

ამის გარდა, ევროპარლამენტის დეპუტატებს სურთ, რომ ევროკავშირმა და მესამე ქვეყნებმა გაზარდონ ცნობადობა ჰოლოდომორის მოვლენებისა და სხვა დანაშაულების შესაებ, რომლებიც საბჭოთა ტოტალიტარულმა რეჟიმმა ჩაიდინა.

რეზოლუციას მხარი დაუჭირა 507-მა დეპუტატმა, 12-მა წინააღმდეგ მისცა ხმა, 17-მა თავი შეიკავა.

მანამდე, 14 დეკემბერს, ჩეხეთის სენატმა ჰოლოდომორი უკრაინელების გენოციდად აღიარა.

უფრო ადრე, 24 ნოემბერს ირლანდიის პარლამენტის ზედა პალატამ, ასევე მოლდოვის პარლამენტმა ჰოლოდომორი უკრაინელი ხალხის გენოციდად აღიარა, რუმინეთის პარლამენტმა კი ჰოლოდომორი კაცობრიობისა და უკრაინელი ხალხის წინააღმდეგ ჩადენილ დანაშაულად ცნო.