დრო, როდესაც პარლამენტის წევრები, პრეზიდენტები, მინისტრები წყვეტდნენ, ვინ უნდა ჩამჯდარიყო ციხეში და ვინ არა, დასრულდა 2012 წელს, – ასე მიმართა საქართველოს პარლამენტის თავმჯდომარე შალვა პაპუაშვილმა „ნაციონალური მოძრაობის“ წევრ ხატია დეკანოიძეს, რომელმაც იუსტიციის მინისტრ რატი ბრეგაძეს „სისხლის სამართლის დამნაშავე“ უწოდა.

„პირველ ყოვლისა, უდანაშაულობის პრეზუმფცია უნდა დაიცვას პარლამენტის ყველა წევრმა, მათ შორის ეს ვრცელდება თქვენზე. მეორე, სისხლის სამართლებრივი საკითხი არ არის პარლამენტის პროცედურა და მესამე, თქვენი განცხადება ადასტურებს მხოლოდ ერთ რამეს ადასტურებს, როცა ამბობთ, ვინ სად აგებს პასუხს. ის დრო, როდესაც პარლამენტის წევრები, მინისტრები, პრეზიდენტები წყვეტდნენ, ვინ უნდა ჩამჯდარიყო ციხეში და ვინ არა, ეს დრო დასრულდა 2012 წელს. ეს არის პრობლემა, რომელსაც თქვენ ვერ აცნობიერებთ“, – განაცხადა შალვა პაპუაშვილმა.