რუსული დაჯგუფება „ვაგნერი“ ბახმუტთან გამართულ ბრძოლაში მნიშვნელოვან როლს ასრულებს. ამის შესახებ ბრიტანეთის დაზვერვის ახალ ანგარიშშია ნათქვამი.

დაზვერვის ცნობით, ბოლო თვეებში დაჯგუფებამ შეიმუშავა შეტევითი ტაქტიკა, რომლის მიხედვით, ის ცუდად მომზადებულ მსაჯავრდებულთა დიდ რაოდენობას იყენებს.

როგორც ბრიტანეთის დაზვერვა აღნიშნავს, ცალკეულ მეომრებს, სავარაუდოდ, ურიგდებათ სმარტფონები ან პლანშეტები, რომლებიც კომერციული თანამგზავრის საშუალებით ადამიანების გადაადგილებისა და თავდასხმის ობიექტზე ინფორმაციას აჩვენებს.

ოცეულისა და უფრო მაღალი დონის მეთაურები, სავარაუდოდ, საფარში რჩებიან და ბრძანებებს რადიოკავშირით გასცემენ, იღებენ ინფორმაციებს ვიდეოს საშუალებით მცირე უპილოტო საფრენი აპარატებიდან.

ცალკეულ ჯგუფებსა და ქვედანაყოფებს ევალებათ დაიცვან წინასწარ განსაზღვრული მარშრუტი, ხშირად ცეცხლის დახმარებით, თუმცა იშვიათად ჯავშანტექნიკასთან ერთად.

 „ვაგნერის“ ოპერატორებს, რომლებიც თავდასხმის მარშრუტს ნებართვის გარეშე გადაუხვევენ, სავარაუდოდ, სიკვდილით დასჯა ემუქრებათ.

 „ეს სასტიკი ტაქტიკა მიზნად ისახავს „ვაგნერის“ ძვირფასი აქტივების - გამოცდილი მეთაურებისა და ჯავშანტექნიკის შენარჩუნებას, რაც ხდება მსჯავრდებული რეკრუტების ხარჯზე, რომელსაც დაჯგუფება განიხილავს, როგორც სახარჯო მასალას“, - აღნიშნულია დაზვერვის ანგარიშში.