კიევში, სოფიას მოედანზე ნაძვის ხე აანთეს. უკრაინის დედაქალაქის მერის, ვიტალი კლიჩკოს თქმით, ნაძვის ხეს სიმბოლურად „უძლეველობის ხე“ უწოდეს.

12 მეტრის სიმაღლის ნაძვის ხე უკრაინის დროშის ფერებშია განათებული.

„სიმბოლურად ჩვენს საშობაო ხეს უძლეველობის ხე ვუწოდეთ, რადგან გვინდა, ვაჩვენოთ, რომ უკრაინელებს ვერ გატეხენ ჩვენ წინაშე არსებული დიდი გამოწვევების მიუხედავად. ამ დილით კამიკაძე დრონებით იერიში განხორციელდა რუსეთის მხრიდან, რომელსაც სურს, გაყინოს უკრაინელები, დატოვოს ისინი გათბობის, წყლის, ელექტროენერგიის გარეშე. ამის მიუხედავად, ჩვენ ვიბრძვით და მარტივად ვერ გაგვტეხენ“, – განაცხადა კლიჩკომ.

კლიჩკოს განცხადებით, არ დაუშვებენ, რომ რუსეთმა მათ  ახალი წელი და შობა მოჰპაროს.

„ბევრი განხილვა იყო იმასთან დაკავშირებით, დაგვედგა თუ არა ნაძვის ხე, თუმცა ჩვენ გადავწყვიტეთ, რომ არ დავუშვებთ, ჩვენს შვილებს წაართვან ისეთი ლამაზი დღესასწაული, როგორიც წმინდა ნიკოლოზის დღეა. ჩვენ არ დავუშვებთ, რომ ახალი წელი და შობა მოგვპარონ“, – განაცხადა უკრაინის დედაქალაქის მერმა, ვიტალი კლიჩკომ.