უკრაინის შეიარაღებული ძალების მეთაური ვალერი ზალუჟნი დეზერტირობისა და დაუმორჩილებლობისთვის სასჯელი გამკაცრებას ითხოვს. ზალუჟნის თქმით, უსამართლობაა, რომ უკრაინელ დეზერტირებს ჯარიმის გადახდის შემთხვევაში, სასჯელი აღარ ემუქრებათ.

„დღეს უნდა წამოვწიო ძალიან რთული თემა. ესაა სამხედრო ნაწილის თვითნებურად დატოვების, დეზერტირობის, ბრძოლის ველის თვითნებურად დატოვების, იარაღის გამოყენებაზე უარის თქმისა და სხვა ბრძანებების შესრულებაზე უარის გამო პასუხისმგებლობის გამკაცრება. მხარს ვუჭერ შესაბამის საკანონმდებლო ცვლილებებს, რომლებიც უმაღლესმა რადამ მიიღო და ვთხოვ პრეზიდენტს, ხელი მოაწეროს კანონს“, – წერს ვალერი ზალუჟნი.

მისი თქმით, მიუღებელია, რომ დღეს კანონში არსებული ხარვეზის გამო უკრაინელების ნაწილს, რომლებიც უარს ამბობენ სამხედრო სამსახურზე, ჯარიმის გადახდის შემთხვევაში, სხვა სასჯელი არ ემუქრებათ.

„ფრონტის ხაზის დაუცველი ნაწილების დაფარვა სხვა სამხედრო მოსამსახურეებს უწევთ, რაც ზრდის პირადი შემადგენლობის, ტერიტორიისა და იქ მცხოვრები მშვიდობიანი მოქალაქეების დანაკარგს“, – წერს ვალერი ზალუჟნი.

უკრაინი მოქალქეების ნაწილი პრეზიდენტ ვოლოდიმირ ზელენსკის მოუწოდებს, ვეტო დაადოს უმაღლესი რადას მიერ მიღებულ კანონს, რომელიც დეზერტირობისთვის სასჯელის გამკაცრებას ითვალისწინებს.

ონლაინპეტიციას, რომელიც კანონის მიღების წინააღმდეგაა მიმართული, ხელი მოაწერა 32 000-ზე მეტმა უკრაინელმა.  მოქალაქეები აცხადებენ, რომ თუ პრეზიდენტი ხელს მოაწერს საკანონმდებლო ცვლილებებს, მაშინ უკრაინის სამხედრო ხელმძღვანელობას მიეცემა უპრეცედენტო ბერკეტი, სამხედროების შანტაჟისა და ნებისმიერი კრიტიკული შენიშვნის გამო მათი ციხეში გაგზავნისთვის.