უკრაინელებისადმი ვიდეომიმართვისას პრეზიდენტმა ვოლოდიმირ ზელენსკიმ განაცხადა, რომ განაგრძობენ თავდაცვის და უსაფრთხოების ძალების მომზადებას მომავალი წლისთვის, რომელიც გადამწყვეტი უნდა იყოს. უკრაინის პრეზიდენტის თქმით, ესმით რა რისკებია ზამთარში, რა უნდა გააკეთონ გაზაფხულზე და რა შედეგები უნდა აჩვენოს თავდაცვის და უსაფრთხოების მთელმა სექტორმა.

"ჩვენ ვაგრძელებთ უკრაინის თავდაცვისა და უსაფრთხოების ძალების მომზადებას მომავალი წლისთვის. ეს უნდა იყოს გადამწყვეტი წელი. ჩვენ გვესმის, რა რისკებია ზამთარში, გვესმის, რა უნდა გავაკეთოთ გაზაფხულზე, რაც ნიშნავს, რომ გვესმის, რა შედეგები უნდა აჩვენოს თავდაცვისა და უსაფრთხოების მთელმა სექტორმა", - თქვა ზელენსკიმ.

ზელენსკის თანახმად, ეს კვირა უკრაინისთვის მნიშვნელოვანი იქნება პოლიტიკური თვალსაზრისით. პრეზიდენტის განცხადებით, მომავალ წელს უნდა შეინარჩუნონ ეროვნული მიზნების საერთო ხედვა. ზელენსკიმ უახლოესი პერიოდის ამოცანებად დაასახელა მტრისგან უკრაინული მიწის გათავისუფლება, ქვეყნის აღდგენა, უკრაინელების სახლში დაბრუნება, სახელმწიფოს შემდგომი დაახლოება ძირითად პარტნიორებთან და უკრაინისთვის ახალი შესაძლებლობების გახსნა.