ბრიტანეთის სამხედრო დაზვერვა აცხადებს, რომ დონეცკის ოლქის ქალაქ მაკიივკაში ოკუპანტების მასობრივი განადგურების ინციდენტი ხაზს უსვამს რუსული არმიის არაპროფესიონალიზმს.

ამის შესახებ საუბარია დიდი ბრიტანეთის თავდაცვის სამინისტროს სადაზვერვო ანგარიშში.

დაზვერვა აღნიშნავს, რომ უკრაინის მიერ პროფტექნიკურ სასწავლებელში განლაგებულ  რუსულ ბაზაზე დარტყმის შედეგად, შენობა მთლიანად განადგურდა.

ბრიტანეთის სამხედრო დაზვერვა რუსი სამხედროების მიერ დაკავებული ობიექტის ნგრევის მასშტაბიდან გამომდინარე, ვარაუდობს, რომ საცხოვრებლის გვერდით ინახებოდა საბრძოლო მასალები და უკრაინელების სარაკეტო დარტყმამ მათი აფეთქებაც გამოიწვია. 

ბრიტანული დაზვერვა ყურადღებას ამახვილებს იმ ფაქტზე, რომ ობიექტი მდებარეობდა 12.5 კილომეტრის დაშორებით ფრონტის ხაზის ავდეევკის მონაკვეთიდან, სადაც განსაკუთრებით დაძაბული სიტუაციაა.

ბრტანეთის სამხედრო დაზვერვის სამსახურის თანახმად, რუს სამხედროებს უკრაინაში ომის დაწყებამდეც ჰქონდათ საბრძოლო მასალების უსაფრთხოდ შენახვის პრობლემა, მაგრამ მაკიივკის ინციდენტი აჩვენებს, როგორ იწვევს არაპროფესიონალიზმი რუსეთის დიდ დანაკარგებს.

ახალი წლის ღამით, უკრაინელმა სამხედროებმა HIMARS-ის ტიპის სარაკეტო სისტემებით ზუსტი იერიში მიიტანეს დონეცკის ოლქის დასახლებულ პუნქტ მაკიივკაში მდებარე რუსულ ბაზაზე, რის შედეგადაც 400-მდე რუსი ჯარისკაცი დაიღუპა, 300 კი დაშავდა.

რუსეთის თავდაცვის სამინისტრომ სარაკეტო დარტყმა და 63 სამხედროს დაღუპვა 2 იანვარს დაადასტურა. თუმცა გვიან ღამით, რუსეთის შეიარაღებული ძალების სამხედრო-პოლიტიკური სამმართველოს უფროსის მოადგილემ, გენერალმა სევრიუკოვმა განაცხადა, რომ ტერიტორიის გაწმენდის შემდეგ, დაღუპულთა რიცხვი 89-მდე გაიზარდა.