„ნაციონალური მოძრაობა“ და მათი მხარდამჭერები ქვეყნის სხვადასხვა ადგილას მიხეილ სააკაშვილისადმი სოლიდარობის აქციას მართავენ. აქცია "მიშას სიცოცხლისთვის" - თბილისში, მშვიდობის ხიდზე მიმდინარეობს.

სოლიდარობის აქციაზე "ნაციონალური მოძრაობის" წევრები, სამოქალაქო აქტივისტები და მიხეილ სააკაშვილის მხარდამჭერები იმყოფებიან. ადგილზე გაჟღერდა საქართველოსა და უკრაინის ჰიმნები, ხიდიდან კი გადმოფინეს ბანერი წარწერით "მიშას სიცოცხლისთვის".

პარალელურად, აქცია მიმდინარეობს მთავრობის კანცელარიის შენობასთანაც. ეს აქცია ენმ-ის თავმჯდომარეობის კანდიდატმა, ლევან ხაბეიშვილმა დააანონსა.

მიხეილ სააკაშვილისადმი სოლიდარობის აქცია იმართება ზუგდიდშიც, სადაც იმყოფება „ნაციონალური მოძრაობის“ თავმჯდომარე ნიკა მელია. მელიას თქმით, სახელმწიფოს ინტერესშია, მიხეილ სააკაშვილი იქნას გადაყვანილი საზღვარგარეთ სამკურნალოდ, რათა სახელმწიფოს შეუნარჩუნდეს ევროპული მომავლის შანსი და ეს საგარეო პოლიტიკური კურსი კვლავ დაუბრუნდეს ქვეყანას.

მიხეილ სააკაშვილის მხარდამჭერი აქცია მიმდინარეობს ქუთაისშიც, პარლამენტის ყოფილ შენობასთან. აქციის მონაწილეების განცხადებით, ხელისუფლებას სააკაშვილის სიცოცხლის გადასარჩენად დაუყოვნებელი ზომების მიღებას სთხოვენ.

აქცია იმართება ბათუმშიც. „თავისუფლება მიშას“, „ნუ მოკლავთ კიდევ ერთ პრეზიდენტს“, – ამ შინაარსის პლაკატებით გამოვიდნენ აჭარის მთავრობის შენობის წინ „ნაციონალური მოძრაობის“ წევრები. აქციის მონაწილეებმა ანთებული სანთლებით ქუჩაში გააკეთეს წარწერა „გახსოვდეს მიშა“.

„ერთიანი ნაციონალური მოძრაობის“ ლიდერები და მათი მხარდამჭერები აქციას მართთავენ შეკვეთილშიც, ბიძინა ივანიშვილის სახლის შესასვლელთან. აქციის ორგანიზატორების თქმით, საპროტესტო აქციები მთელი ქვეყნის მასშტაბით პერმანენტულად გაიმართება.