სააგენტო  reuters უკრაინელ სამხედროებზე დაყრდნობით აღმოსავლეთ უკრაინაში 5 იანვარს მიმდინარე მძიმე ბრძოლების შესახებ იუწყება.

სააგენტოს ცნობით, რუსეთის არმია დიდი დანაკარგების მიუედავად, აგრძელებს შეტევის მცდელობებს დონეცკის ოლქში ბახმუტის მიმართულებაზე. რუსი ოკუპანტების შეტევები ავდეევკისა და კუპიანსკის მიმართულებებზე ჯერჯერობით წარუმატებელია.

მანამდე უკრაინის პრეზიდენტმა ვოლოდიმირ ზელენსკიმ განაცხადა, რომ რუსეთი დიდი დანაკარგების მიუხედავად,  ბახმუტის რაიონში ძალებს ზრდის.

ლუჰანსკის ოლქის გუბერნატორმა სერჰი გაიდაიმ განაცხადა, რომ უკრაინელი სამხედროები ტერიტორიებს ნაბიჯ-ნაბიჯ იბრუნებენ, მაგრამ ეს სწრაფად არ ხდება.

გაიდაის თქმით, ყინვის გაძლიერებასთან ერთად ბრძოლები უფრო სასტიკი გახდება, რადგან გაყინული მიწა მძიმე ტექნიკის გამოყენების შესაძლებლობას იზლევა.

ამასთან, აშშ-ის ადმინისტრაციის კიდევ ერთი მაღალჩინოსნის პროგნოზით, ომი უკრაინაში სულ უფრო მძიმე და ხანგრძლივი იქნება.

„ბრძოლები სულ უფრო მძიმე ხდება... ის, რასაც ჩვენ ბახმუტში ვხედავთ, მოსალოდნელია ფრონტის სხვა მონაკვეთებზეც, საბრძოლო მოქმედებები უახლოესი თვეების განმავლობაში გაგრძელდება“, - ამბობს ამერიკელი მაღალჩონოსანი, რომლის ვინაობასაც reuters არ ასაჯაროვებს.