შინაგან საქმეთა ყოფილი მინისტრის ვანო მერაბიშვილის ცემის საქმეზე პოლიციის მთავარ სამმართველოში გიგიშა შარაშიძე რამდენიმე საათის განმავლობაში იკითხებოდა.

შარაშიძეს მომხდართან დაკავშირებით დეტალებზე არ უსაუბრია. მან მედიასთან განაცხადა, რომ კონფლიქტის დაწყების მიზეზზე თავად მერაბიშვილმა უნდა ისაუბროს.

„იმედი მაქვს, ეყოფა ვაჟკაცობა და იტყვის. მე დავიწყე დაპირისპირება, ფიზიკურად, ხელით. მიზეზზე უკვე გითხარით, თუ ეყოფა ვაჟკაცობა, გითხრათ, მე არ ვაპირებ“, – აღნიშნა გიგიშა შარაშიძემ.

"უცნობის" სიძის ადვოკატის, გელა ნიკოლაიშვილის განცხადებით, გიგიშა შარაშიძის მხრიდან ვანო მერაბიშვილთან ფიზიკური დაპირისპირება ბუტა რობაქიძის სახელის ხსენებას მოჰყვა.

გიორგიმ უთხრა, მე ბუტა რობაქიძის მეგობარი ვარ გიორგი შარაშიძეს აინტერესებდა, რა რეაქცია ექნებოდა და განიცდიდა თუ არა ადამიანურ სინანულს ბუტა რობაქიძის სახელის ხსენებაზე ვანო მერაბიშვილი მერაბიშვილმა უპასუხა რა დროს ბუტა რობაქიძეა. ამან გიორგი გააღიზიანა და წონასწორობიდან გამოვიდა. რამდენჯერმე ხელი მოუქნია, ოღონდ ზუსტად არ ახსოვს სხეულის რა ნაწილში გაარტყა ხელი. შემდეგ ვანო მერაბიშვილი აფთიაქიდან გაიქცა, რა დროსაც ფეხი მოუქნია. აფთიაქთან ახლოს ჰყავდა მანქანა და ვიდრე ჩაჯდებოდა, შეურაცხმყოფელი სიტყვები მიაძახა“, - აღნიშნა ნიკოლაიშვილმა.

შინაგან საქმეთა სამინისტროში აცხადებენ, რომ შინაგან საქმეთა ყოფილ მინისტრთან, ვანო მერაბიშვილთან დაკავშირებით მედიაში გავრცელებული ინფორმაციის საფუძველზე გამოძიება სისხლის სამართლის კოდექსის 126-ე მუხლით მიმდინარეობს, რაც ძალადობას გულისხმობს.