რუსეთის მხრიდან „საშობაო ზავის“ გამოცხადების მიუხედავად, რუსი სამხედროები საბრძოლო მოქმედებებს მაინც აგრძლებდნენ. ამის შესახებ აშშ-ის თავდაცვის მდივნის თანაშემწემ ლორა კუპერმა ბრიფინგზე განაცხადა.

 „რაც შეეხება პუტინის განცხადებას ცეცხლის შეწყვეტის შესახებ, შემიძლია გითხრათ, რომ დღეს უკრაინაში ჩვენ ვხედავთ საბრძოლო მოქმედებებს, მაშინაც კი როცა საუბარია ცეცხლის შეწყვეტის „ფანჯარაზე“, - განაცხადა მან.

კუპერის თქმით, რუსეთის არმია საჭიროებს შესვენებასა და გადაიარაღებას, რუსეთის მიერ გამოცხადებული „ზავი“ კი არასკმარისად ხანგრძილივია, რომ ეს განხორციელდეს.

 „პუტინის განცხადება უნდა მივიღოთ გარკვეული სკეპტიციზმით, ეს ის ადამიანია, რომელმაც თქვა, რომ არ შეიჭრებოდა უკრაინაში“, - განაცხადა პენტაგონის წარმომადგენელმა.

დამაზუსტებელ შეკითხვაზე შესაძლებელია თუ არა ითქვას, რომ სწორედ რუსეთის ძალებმა დაარღვიეს მათ მიერვე დეკლარირებული „ზავი“, კუპერმა განაცხადა: „შემიძლია დაგიდასტუროთ, რომ საბრძოლო მოქმედებები გრძელდება. და რა თქმა უნდა, ადგილზე იბრძვიან რუსები, დიახ, ეს ასეა“.

შეგახსენებთ, რუსეთის პრეზიდენტმა, ვლადიმირ პუტინმა უკრაინაში საშობაოდ ერთი დღით ცეცხლის შეწყვეტის განკარგულება გასცა. ე.წ. საშობაო ზავის ინიციატივით თავდაპირველად რუსეთის პატრიარქი კირილი გამოვიდა.

უკრაინის პრეზიდენტის, ვოლოდიმირ ზელენსკის შეფასებით, რუსეთს სურს, რომ შობა გამოიყენოს, რათა დონბასში უკრაინელების წინსვლა შეაჩეროს და ამ პერიოდს განახლებული ძალებით ომის გასაგრძელებლად გამოიყენებს.