რუსეთის თავდაცვის მინისტრმა, სერგეი შოიგუმ უკრაინაში მოქმედი საოკუპაციო ძალების მეთაურად რუსეთის გენერალური შტაბის ხელმძღვანელი და თავისი მოადგილე, ვალერი გერასიმოვი დანიშნა. ინფორმაიას რუსული სააგენტო "ტასი" ავრცელებს.

რუსეთის საჰაერო-კოსმოსური ძალების მეთაური, სერგეი სუროვიკინი, რომელიც გასული წლის ოქტომბერში უკრაინაში მოქმედი საოკუპაციო ძალების ხელმძღვანელად დაინიშნა, ახლა გერასიმოვის ერთ-ერთი მოადგილის მოვალეობას შეასრულებს.

რუსეთის თავდაცვის სამინისტროში ამბობენ, რომ საოკუპაციო ძალების მეთაურად უფრო მაღალი რანგის სამხედრო პირის დანიშვნა უკრავშირდება ე.წ. სპეცოპერაციის განხორციელების პროცესში გადასაწყვეტი ამოცანების მასშტაბების გაფართოებას, შეიარაღებული ძალების სახეებისა და ტიპების უფრო მჭიდრო ურთიერთქმედების აუცილებლობას, ასევე სამხედრო ჯგუფისთვის ყველა სახის უზრუნველყოფისა და ეფექტიანი მართვის ხარისხის გაზრდას.

ოქტომბერში სუროვიკინის დანიშვნის შემდეგ რუსეთის ძალებმა უკრაინაში მდებარე ენერგეტიკულ და კრიტიკული მნიშვნელობის ინფრასტრუქტურის ობიექტებზე მასობრივი სარაკეტო იერიშების განხორციელება დაიწყეს.