უკრაინის მთავრობა იმედოვნებს ევროკავშირში გაწევრიანების შესახებ მოლაპარაკებების დასრულებას და უკრაინის წევრობის შესახებ შეთანხმების ხელმოწერას ორი წლის პერსპექტივაში. ამის შესახებ პრემიერ-მინისტრმა, დენის შმიგალმა მინისტრთა კაბინეტის სხდომაზე განაცხადა.

„ახლა ჩვენ ვასრულებთ ევროკომისიის შვიდი რეკომენდაციის შესრულებას, რაც მოგვცემს შესაძლებლობას, გადავდგათ მომდევნო ნაბიჯები ინტეგრაციისთვის. ასევე უნდა გავაანალიზოთ ჩვენი კანონმდებლობის ევროკავშირის კანონმდებლობასთან შესაბამისობა, რათა მკაფიოდ გავიგოთ შესასრულებელი სამუშაოს მოცულობა“, -აღნიშნა შმიგალმა.

როგორც უკრაინის პრემიერმა განაცხადა, პარალელურად, უკრაინა მოემზადება გაწევრიანების შესახებ მოლაპარაკებებისთვის.

„შემდეგ ჩვენ გველოდება მოლაპარაკებების გზა, რომელიც უნდა დასრულდეს ევროკავშირში უკრაინის გაწევრიანების შეთანხმების ხელმოწერით. ჩვენ ვიმედოვნებთ ამ გზის გავლას ორ წელზე ნაკლებ დროში და მაშინ უკრაინა გახდება ევროკავშირის სრულუფლებიანი წევრი“, – განაცხადა უკრაინის პრემიერ-მინისტრმა.

მისი თქმით, უახლოეს კვირებში უკრაინას ეწვევა ევროკომისიის დელეგაცია, ურსულა ფონ დერ ლაიენისა და 10-ზე მეტი ევროკომისრის შემადგენლობით.

„ეს მხოლოდ ომში უკრაინის მხარდაჭერის მნიშვნელოვანი სიგნალი არ იქნება, ის ასევე აჩვენებს, რომ ევროკავშირი ღიაა უკრაინის გაწევრიანების შესახებ მოლაპარაკებების პროცესისთვის“, – აღნიშნა დენის შმიგალმა