ბრიტანეთის თავდაცვის სამინისტროს დაზვერვის სამმართველოს ინფორმაციით, უკრაინის ჯარმა, სავარაუდოდ, სოლედარი დატოვა და თავდაცვით ბრძოლას ბახმუტის შემოგარენში განაგრძობს.

როგორც იუწყებიან, 16 იანვარს, უკრაინის არმია ქალაქ სოლედარიდან გავიდა, რის შემდეგაც რუსეთის საოკუპაციო ძალებმა და “ვაგნერის“ დაჯგუფებამ ქალაქზე კონტროლი დაამყარა. უკრაინის ჯარმა, სავარაუდოდ, დასავლეთით ახალი თავდაცვითი ხაზები გაავლო.

რუსეთის იერიში სოლედარზე ძირითადად ხორციელდებოდა „ვაგნერის“ დაჯგუფების ძალებით და საბოლოო ჯამში მიმართული იყო ბახმუტის ალყაში მოქცევისკენ.  

ბახმუტში უკრაინის ძირითადი მომარაგების ერთ-ერთი გზა ამჟამად მზარდი ზეწოლის ქვეშ იმყოფება.

ბრიტანეთის დაზვერვის ფოტომასალაში ჩანს, რომ 2023 წლის იანვრის დასაწყისში ბახმუტის სამხრეთი და აღმოსავლეთი ინტენსიური საარტილერიო ცეცხლის ქვეშ იმყოფება. ანგარიშის თანახმად, უკრაინის ძალები, სავარაუდოდ, განაგრძობენ თავდაცვას რუსეთის ძალებისგან ქალაქის შემოგარენში.

მანამდე, ბრიტანეთის დაზვერვა იუწყებოდა, რომ ბოლო ექვს კვირაში უკრაინამაც და რუსეთმაც უმნიშვნელო წარმატებებს მიაღწიეს, თუმცა ოპერატიული გარღვევისთვის ორივე მხარეს ესაჭიროება ბრძოლისუნარიანი შენაერთების შექმნა, რომლებსაც ამ წარმატებების გამოყენება შეეძლებათ.