უკრაინის უსაფრთხოების სამსახურმა ბროვარში ვერტმფრენის ჩამოვარდნის საქმეზე წარმოება დაიწყო. ძირითად ვერსიებს შორის არის ფრენის წესების დარღვევა, ტექნიკური გაუმართაობა და გამიზნული ქმედებები. ამის შესახებ უკრაინული მედია წერს.

„უკრაინის უსაფრთხოების სამსახურის გამომძიებლებმა დაიწყეს კიევის ოლქის ქალაქ ბროვარში ვერტმფრენის ჩამოვარდნის ფაქტზე წინასწარი გამოძიება. ახლა განიხილება ტრაგედიის რამდენიმე ვერსია, მათ შორის ფრენის წესების დარღვევა, ვერტმფრენის ტექნიკური გაუმართაობა, სატრანსპორტო საშუალების განადგურების გამიზნული ქმედებები“, – ნათქვამია უკრაინის უსაფრთხოების სამსახურის განცხადებაში.

უკრაინის უსაფრთხოების სამსახურის თანახმად, წინასწარი ინფორმაციით, დაიღუპა სულ მცირე 16 ადამიანი, მათ შორის 3 ბავშვი. კიევის ოლქის სამხედრო ადმინისტრაციის ხელმძღვანელ ოლექსი კულებას ცნობით, დაღუპულია -18. ჰოსპიტალიზებულია 30 ადამიანი, მათ შორის 12 ბავშვი. დაღუპულთა შორის არის შინაგან საქმეთა სამინისტროს ხელმძღვანელობა – შინაგან საქმეთა მინისტრი დენის მონასტირსკი, მისი პირველი მოადგილე ევგენი ენინი და სამინისტროს სახელმწიფო მდივანი იური ლუბკოვიჩი.