რუსეთის დუმის სპიკერი, ვიაჩესლავ ვოლოდინი თანამედროვე იარაღის უკრაინისთვის მიწოდების მასშტაბების გაზრდის საპასუხოდ, დასავლეთის ქვეყნებს გლობალური კატასტროფითა და „განადგურებით“ ემუქრება. ამის შესახებ ვიაჩესლავ ვოლოდინი „ტელეგრამის“ არხზე წერს.

„ვაშინგტონი და ნატო-ს ქვეყნები თუ მიაწოდებენ უკრაინას იარაღს, რომელსაც კიევი მშვიდობიან ქალაქებზე შეტევითი დარტყმებისთვის და ჩვენი ტერიტორიების დაკავებისთვის გამოიყენებს, როგორც ისინი იმუქრებიან, ეს მიგვიყვანს საპასუხო ზომებამდე უფრო მძლავრი იარაღის გამოყენებით“, – წერს ვოლოდინი.

მისი თქმით, კონგრესის წევრებმა, ბუნდესტაგის დეპუტატებმა, საფრანგეთის ეროვნულმა კრებამ და ევროპის სხვა პარლამენტებმა უნდა გააცნობიერონ პასუხისმგებლობა კაცობრიობის წინაშე.

ვოლოდინი წერს, რომ რუსეთს შეიარაღებაში ტექნოლოგიური უპირატესობა აქვს და აუცილებელია უცხოელმა პოლიტიკოსებმა გაიგონ, რომ ეს შეიძლება დასრულდეს მსოფლიო მასშტაბის ტრაგედიით, რომელიც გაანადგურებს მათ ქვეყნებს.

„უსაფუძვლოა არგუმენტები, რომ ბირთვულ სახელმწიფოებს აქამდე არ გამოუყენებიათ მასობრივი განადგურების იარაღი, ლოკალური კონფლიქტების დროს. ეს იმიტომ, რომ ეს სახელმწიფოები არ ყოფილან სიტუაციაში, როდესაც არსებობდა მათი მოქალაქეების უსაფრთხოებისა და ქვეყნის ტერიტორიული მთლიანობის საფრთხე“.