არსებობს გარკვეული ინტერესები, გლობალური ინტერესები საქართველოსთან მიმართებით, მათ შორის მეორე ფრონტთან დაკავშირებით, - პირველი არხის ცნობით, ამის შესახებ პარტია „ქართული ოცნების“ თავმჯდომარემ, ირაკლი კობახიძემ განაცხადა.

კობახიძის თქმით, მის მიერ დღეს გამოქვეყნებული ექსპორტთან დაკავშირებული სტატისტიკა ადასტურებს, რომ საქართველოს გავლით არ ხდება სანქციების გვერდის ავლა.

მისი თქმით, ექსპორტთან დაკავშირებულ სტატისტიკა აჩვენებს, რომ "არათუ არაპროპორციული გაზრდა არ მომხდარა ექსპორტისა საქართველოდან რუსეთის ფედერაციაში, არამედ ექსპორტის ზრდა იყო ბევრად დაბალი, ვიდრე სხვა ძირითადი პარტნიორი ქვეყნების შემთხვევაში. აქედან გამომდინარე, ძალიან ნათელია, რომ, სამწუხაროდ, შეგნებულად ხდება ცრუ ინფორმაციის გავრცელება, რასაც საფუძვლად უდევს პოლიტიკური ინტერესები. ჩვენ ყველაფერი უნდა დავუპირისპიროთ ასეთ პოლიტიკურ ინტერესებს, რათა საქართველოს ეროვნული ინტერესები იყოს დაცული".

კობახიძის თქმით, გარკვეული ძალების ინტერესებშია, რომ საქართველოს იმიჯი მაქსიმალურად დაზიანდეს.

"ხშირად გვისაუბრია, რომ არსებობს გარკვეული ინტერესები, გლობალური ინტერესები საქართველოსთან მიმართებით, მათ შორის მეორე ფრონტთან დაკავშირებით და, ბუნებრივია, შესაბამისი ძალების ინტერესებშია, რომ საქართველოს იმიჯი მაქსიმალურად დაზიანდეს. მიზანი არის სახელმწიფოს დასუსტება, ხელისუფლების დასუსტება და სწორედ ამისთვის ხდება ასეთი ცრუ ინფორმაციის გავრცელება, რაც ძალიან სამწუხარო მოვლენაა. ჩვენ სწორედ იმისთვის უნდა დავიცვათ ჩვენი ეროვნული ინტერესები, რომ არ იყოს საქართველოში უზრუნველყოფილი ესკალაცია, რაც სერიოზული პრობლემის მომტანია ჩვენი ქვეყნისთვის. ამას ჩვენ არ დავუშვებთ“, – განაცხადა ირაკლი კობახიძემ.