ფსიქიატრმა ფაქტობრივად დაადასტურა, რომ ის საუბრობდა პაციენტისა და დედისგან მიღებული ინფორმაციის საფუძველზე, – ამის შესახებ პენიტენციური სამსახურის წარმომადგენელმა, გელა ნიკოლაიშვილმა საქართველოს ყოფილი პრეზიდენტის, მიხეილ სააკაშვილის საქმის სასამართლო პროცესის დასრულების შემდეგ განაცხადა.

„ფსიქიატრის საუბარში, ჩემთვის მნიშვნელოვანი იყო ორი მომენტი. ერთი, ფსიქიატრმა ფაქტობრივად დაადასტურა, რომ ის საუბრობდა პაციენტისა და დედისგან მიღებული ინფორმაციის საფუძველზე, ძირითადად, აქედან გამომდინარე დაწერა დასკვნა. თუმცა, ასევე თქვა, რომ მე, რომ მითხრეს სიტყვაზე მძიმე მეტალებია, მე დავეყრდენი მათ ნათქვამს და არ გადამიმოწმებია ანამნეზში ან სამედიცინო დოკუმენტში რეალურად, იყო თუ არა ეს დასკვნებიო. იგივე მითხრა, მე, მაგალითად, პაციენტმა რომ მითხრა არ მახსოვსო, მე დავიჯერე, რომ მას არ ახსოვს, სიმულაცია გამოვრიცხე, ამ შემთხვევაშიო“, – განაცხადა ნიკოლაიშვილმა.

თბილისის საქალაქო სასამართლოში საქართველოს ყოფილი პრეზიდენტისთვის, მიხეილ სააკაშვილისთვის სასჯელის გადავადების ან სასჯელისგან გათავისუფლების საკითხზე გამართულ პროცესზე ბრიტანელი ფსიქიატრი კორნელიუს კატონისი დაიკითხა. როგორც ფსიქიატრმა განაცხადა, მიხეილ სააკაშვილს აქვს პოსტტრავმული და ნეიროკოგნიტური აშლილობა. მისივე თქმით, სააკაშვილის მკურნალობა არ იქნება ეფექტური იმ გარემოში, სადაც თავს არ გრძნობს უსაფრთხოდ და გრძნობს საშიშროებას.