”პრაიმნიუსჯორჯია” თავისუფალი და აგრარული უნივერსიტეტების ბიზნესსკოლის დეკანს, გიგა ბედინეიშვილს ესაუბრა. მიიჩნევს, რომ ახალ მთავრობას ეკონომიკური სიტუაციის გაჯანსაღებისთვის არაფერი გაუკეთებია. ბედინეიშვილის თქმით, ბევრი მიმართულებით საქართველოს მდგომარეობა პირიქით გაუარესდა კიდეც.

 - ხელისუფლება საუბრობს ეკონომიკის გაჯანსაღების პროცესზე, რეალურად თუ შეინიშნება გაჯანსაღების პროცესი და სად?

 - მე არ ვიცი, იმას რაც ჩვენს ქვეყანაში ხდება ეკონომიკის გაჯანსაღების პროცესი ჰქვია თუ არა. ეკონომიკური ზრდა არის შენელებული, ლარის კურსი გაუფასურებულია. ასევე ერთ სულ მოსახლეზე მშპ არის შემცირებული. ვერანაირად ამ პროცესს ეკონომიკის გაჯანსაღების პროცესს ვერ დავარქმევდი.

 - პრემიერ-მინისტრი და ეკონომიკური გუნდი დაგეგმილ ეკონომიკურ ზრდის პროგნოზს რეალისტურს უწოდებდენ. თუ გასული წლის მაგალითს მოვიყვანთ, ლამის ბოლო თვემდე არ აღიარებდა ხელისუფლება იმას, რომ ეკონომიკური ვარდნა იყო. ამის გათვალისწინებით, რამდენად რეალისტურია ეკონომიკური ზრდის პროგნოზი?

 - როგორც მახსოვს, 2015 წლის მშპ-ს ზრდის პროგნოზი 2 %-ია, რაც რეალისტური შეიძლება იყოს. თუმცა მე ამ მიმართულებით უფრო სხვა სიტყვებს გამოვიყენებდი - ეს შეიძლება იყოს მაინც ამბიციური გეგმა. საქართველოს ეკონომიკა საკმაოდ მოქნილი ეკონომიკაა. თუმცა ეს ამ მთავრობის დამსახურება არ არის. ეს არის ამ მთავრობის ძალისმევის მიუხედავად გამოწვეული. მინდა გითხრათ, რომ ჩვენი ეკონომიკის დერეგულაციისთვის საკმაოდ დიდი ნაბიჯები გადაიდგა. საუბარი მაქვს 2003 წლიდან 2008 წლამდე გატარებულ რეფორმებზე, მაგალითისათვის ძალიან გამარტივდა ბიზნესის კეთება. კარგი ინერცია იყო იმისათვის, რომ ეკონომიკა მართლაც უფრო მოქნილი და ჯანსაღი ყოფილიყო. ჩვენმა ეკონომიკამ რამდენჯერმე აჩვენა კიდეც, რომ შოკებს კარგად უძლებს. ზოგადად კი შოკებს კარგად უძლებს ის ეკონომიკა, რომელიც მოქნილია. რაც ახალი მთავრობა მოვიდა, ან არაფერი გაკეთებულა ეკონომიკური სიტუაციის გაჯანსაღებისთვის, ან პირიქით ბევრი თვალსაზრისით ეკონომიკური პოლიტიკა გააუარესა. მაგრამ საქმე იმაშია, რომ ამ 3 წლის განმავლობაში ყველაფრის დაქცევა ვერ მოახერხა.

 - სებ-ის პრეზიდენტმა თქვა, რომ თუ ინვესტიციები შემოვა, ეკონომიკა გაჯანსაღდება და პროცესები დარეგულირდება, შესაძლებელია ლარი ძველ ნიშნულს დაუბრუნდესო. რამდენად რელიასტურია ეს პროგნოზი?

დიდი ხანია სხვადასხვა მხარე გაიძახის, რომ ლარი გამყარდება. ერთადრეთი რაც მოხდა არის ის, რომ რეზერვები დავხარჯეთ იმისათვის, რომ ლარი ხელოვნურად, 2 %-ით გაგვემყარებინა, რომელიც ისედაც მოხდებოდა. ფაქტობრივად, რაც სებ-ის პრეზიდენტმა თქვა არის ის, რომ ლარი ზედმეტად გაყიდული იყო, ანუ ქანქარა ზედმეტად გაქანდა. უკან დასაბრუნებლად სებ-მა საკუთარი რეზერვები გაყიდა. რომ არ გაეყიდა რეზერვები ბანკს, გამყარება მაინც მოხდებოდა. თუმცა ეს შედარებით ნელი პროცესი იქნებოდა. მე არ მიმაჩნია სწორად, რომ სებ-მა ამისათვის რეზერვები უნდა გაიყიდოს, მაგრამ სხვა მხრივ სებ-ს ვერაფერში ვერ დაადანაშაულებ, რადგანაც საკმაოდ რთულ პერიოდში კარგად მოქმედებდა ამიტომ მზად ვარ ეს მცირედი სებ-ს შევუნდო.

”პრაიმნიუსჯორჯია”, ესაუბრა გიორგი საკარული